Дар Женева ҳамкории Осиёи Марказӣ бо Маркази минтақавии СММ оид ба дипломатияи пешгирикунанда баррасӣ шуд

ДУШАНБЕ, 07.03.2024 /АМИТ «Ховар»/. Дар Женева вохӯрии Намояндагони доимии давлатҳои Осиёи Марказӣ дар назди Шуъбаи Созмони Милали Муттаҳид (СММ) ва дигар ташкилоти байналмилалӣ дар Женева бо Намояндаи махсуси дабири кулли Созмони Милали Муттаҳид, роҳбари Маркази минтақавии созмон оид ба дипломатияи пешгирикунанда дар Осиёи Марказӣ (UNRCCA) Каха Имнадзе баргузор гардид. Дар ин хусус АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

 Дар мулоқот ҳолати кунунӣ ва дурнамои ҳамкории давлатҳои Осиёи Марказӣ ва Маркази минтақавӣ мавриди баррасӣ қарор гирифт.

Сафири Фавқулода ва Мухтори Ҷумҳурии Тоҷикистон дар Конфедератсияи Швейтсария,  намояндаи доимии Ҷумҳурии Тоҷикистон дар назди шуъбаи Созмони Милали Муттаҳид ва дигар ташкилоти байналмилалӣ дар Женева Шараф Шерализода мавқеи мамлакатро баён намуд.

АКС: Вазорати корҳои хориҷии Ҷумҳурии Тоҷикистон