ФУТБОЛ. Дар Тоҷикистон Барномаи рушди истеъдодҳои ҷавон амалӣ мегардад

ДУШАНБЕ, 04.03.2024 /АМИТ «Ховар»/. Федератсияи футболи Тоҷикистон лоиҳаи нави Федератсияи байналмилалии ассотсиатсияҳои футбол  (ФИФА)  – «Talent Development Scheme»-ро дар мамлакат амалӣ менамояд. Ин лоиҳаи ҷустуҷӯи истеъдодҳо ва рушди бозигарон барои дастаҳои мунтахаб мебошад, таъкид намуданд ба АМИТ «Ховар» дар Федератсияи футболи Тоҷикистон.

Соли 2023 Федератсияи футболи Тоҷикистон ҷузъи барномаи густурдаи «FIFA Talent Development Scheme» гардид. Бар асоси маълумоте, ки Федератсияи футболи Тоҷикистон пешниҳод намуд, ФИФА вазъи футболи Тоҷикистонро омӯхта, чанд тавсия додааст.

Раёсати техникии Федератсияи футболи Тоҷикистон барномаи рушди техникиро то соли 2026 таҳия намуд, ки дар он самтҳои калидӣ ва афзалиятноки рушд тавсиф шудаанд. Яке аз онҳо дарёфти футболбозони боистеъдод аст, ки аз ҳама муҳим, ба ҳар бозигар имкон дода мешавад, то худро нишон диҳад. Бозингароне, ки аз рӯйи ин система соли 2023 интихоб шуданд, имрӯз пояи дастаи мунтахаби наврасони Тоҷикистонро (U-16) ташкил медиҳанд, ки ду сол пайиҳам дар мусобиқоти Ассотсиатсияи футболи Осиёи Марказӣ (CAFA) бомуваффақият иштирок намуда, ғолиб гардид. Ҳадафи раёсати техникии Федератсияи футболи Тоҷикистон назорати рушд ва пешрафти ин бозигарон аст.

Федератсияи футболи Тоҷикистон имсол дар чаҳорчӯби ин тарҳ тасмим гирифтааст, ки бозигарони аз 12 то 16-соларо муайян ва барои мураббиёни боистеъдоди дастаҳои наврасону занона семинарҳо гузаронад. Чанде пеш раёсати техникии Федератсияи футболи Тоҷикистон барои мураббиёни дастаҳои наврасон дар мавзуи «Банақшагирии микросикли ҳафтаина дар давраи омодагӣ» семинар баргузор намуд.

Дар баробари ин барои 23 бозигаре, ки моҳи декабр аз байни 65 бозигари боистеъдоди то 14-сола интихоб шуданд, ҷамъомади таълимӣ гузаронида шуд. Моҳи март барои дастаҳои занона низ чунин чорабиниҳо ташкил мегарданд.

АКС: Федератсияи футболи Тоҷикистон