Дар Душанбе қоидаҳо ва расмиёти идоракунии харид ва молия зимни татбиқи лоиҳаҳо шарҳ дода шуданд

ДУШАНБЕ, 25.04.2024 /АМИТ «Ховар»/.  Хазинаи авруосиёии субот ва рушд дар Душанбе дар бораи қоидаҳо ва тартиби харид  ва идоракунии молия дар иҷрои тарҳҳое, ки аз ҷониби хазина маблағгузорӣ мешаванд, машғулият доир намуд. Дар он  намояндагони Агентии    инноватсия  ва технологияҳои рақамии назди Президенти Ҷумҳурии Тоҷикистон ва Вазорати молияи Ҷумҳурии Тоҷикистон иштирок намуданд. Дар ин хусус ба АМИТ «Ховар» дар маркази матбуоти Хазинаи авруосиёии субот ва рушд иттилоъ доданд.

Ҳангоми татбиқи лоиҳаҳое, ки аз ҷониби Хазинаи авруосиёии субот ва рушд маблағгузорӣ мешаванд, хариди молҳо, корҳо ва хизматрасонии зарурӣ тибқи стандартҳои хазина доир мешавад, ки ба беҳтарин равишҳои ҷаҳонӣ комилан мувофиқ ҳастанд. Ин истифодаи самараноки маблағҳои ҷудошударо таъмин менамояд, ки он махсусан ҳангоми татбиқи лоиҳаҳои Хазинаи авруосиёии субот ва рушд, ки маъмулан ба даст овардани унсурҳои мураккаби инфрасохтор, хизматрасониҳои машваратии мукаммал, қисмҳои бузурги таҷҳизот, технологияҳои иттилоотӣ ва  маводи истеъмолии заруриро дар бар мегиранд, муҳим аст.

Иштирокчиёни машғулият ба гурӯҳҳои татбиқи лоиҳаҳо, ки аз ҷониби Ҳукумати Тоҷикистон таъсис дода шудаанд, ҳамроҳ буда, барои кор дар онҳо масъул мебошанд. Дар байни лоиҳаҳои дарпешистода «Беҳдошти иқтидори институтсионалӣ барои рушди хизматрасонии рақамии давлатӣ», «Вусъат додани татбиқи принсипҳои буҷети барномавӣ» ва «Баланд бардоштани сатҳи иммунии аҳолии кӯдакон ва калонсолон» ҳастанд.

Ҷумҳурии Тоҷикистон давлати муассиси Хазинаи авруосиёии субот ва рушд маҳсуб мешавад. Давоми фаъолияти хазина барои тараққиёти мамлакат қариб 240 миллион доллар ҷудо карда шуд. Таҷдиди Неругоҳи барқи обии «Норак», таҷдиди шабакаҳои обёрӣ, барномаи «Корвони саломатӣ» барои пешгирии бемориҳо дар минтақаҳои душворгузар, дастгирии буҷет дар давраи пандемияи COVID-19, хароҷоти иҷтимоӣ ва ислоҳоти иҷтимоӣ-иқтисодӣ аз ҷумлаи ин лоиҳаҳо мебошанд.

АКС аз манбаъҳои боз