Дар Маҷмааи тандурустии «Истиқлол» табибони Тоҷикистон ва Эрон амалиёти мураккаби ҷарроҳӣ анҷом доданд

ДУШАНБЕ, 25.04.2024  /АМИТ «Ховар»/. Табибони Тоҷикистон ва Эрон дар самти гузаронидани амалиёти мураккаби ҷарроҳӣ табодули таҷриба намуданд. Дар ин хусус АМИТ «Ховар» бо истинод ба Вазорати тандурустӣ  ва ҳифзи иҷтимоии аҳолии Ҷумҳурии Тоҷикистон хабар медиҳад.

Дар доираи сафари як гурӯҳ табибони Ҷумҳурии Исломии Эрон ба Ҷумҳурии Тоҷикистон табибони ду давлат дар самти амалиёти мураккаби ҷарроҳӣ дар бахшҳои онкологӣ ва асаб табодули таҷриба намуданд. Аз ҷумла, дар Маҷмааи тандурустии «Истиқлол» бо иштироки ректори Донишгоҳи илмҳои тибби шаҳри Шерози Ҷумҳурии Исломии Эрон Воҳид Ҳусейнӣ ва табибони тоҷик ба тариқи эндоскопӣ амалиёти ҷарроҳии онкологӣ гузаронида шуд.

Бояд гуфт, ки чунин амалиёти ҷарроҳӣ дар бахши онкологӣ яке аз амалиёти мураккаб ба шумор меравад.

Инчунин бо иштироки табибони Ҷумҳурии Тоҷикистон ва Ҷумҳурии Исломии Эрон дар Маҷмааи тандурустии «Истиқлол» амалиёти ҷарроҳии асаб ба тариқи эндоскопӣ гузаронида шуд.

Мақсади табодули таҷриба бо табибони Ҷумҳурии Исломии Эрон, ки ин давлат дар бахши ҷарроҳӣ дар ҷаҳон шуҳрат дорад, боз ҳам васеъ ба роҳ мондани чунин амалиёти мураккаби ҷарроҳӣ дар соҳаи тибби Тоҷикистон мебошад.

Дар Маҷмааи тандурустии «Истиқлол» ҳайати меҳмонон бо табибони тоҷик доир ба ворид намудани усулҳои нави ташхису табобат гуфтугӯ ва ба густариши ҳамкорӣ дар ин самт ҳавасмандӣ зоҳир намуданд.

 АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон