Доир ба истифодаи самараноки замин ва нақши он дар таъмини амнияти озуқаворӣ машғулияти такмили ихтисос оғоз ёфт

ДУШАНБЕ, 30.04.2024 /АМИТ «Ховар»/. Дар Академияи идоракунии давлатии назди Президенти Ҷумҳурии Тоҷикистон барои муовинони раисони кумитаҳои идораи замини вилоятҳо ва шаҳру ноҳияҳо дар мавзуи «Истифодаи самараноки замин ва нақши он дар таъмини амнияти озуқаворӣ» машғулияти такмили ихтисос оғоз гардид.

Дар ин хусус ба АМИТ «Ховар» дар Академияи идоракунии давлатӣ иттилоъ доданд.

Дар ифтитоҳи машғулият иброз гардид, ки истифодаи самараноки замин дар таъмини амнияти озуқаворӣ нақши калидӣ дошта, замин манбаи маҳдудест, ки бояд моҳирона идора карда шавад. Яке аз ҷанбаҳои калидии истифодаи самараноки замин дар Тоҷикистон ҷорӣ намудани технологияҳои муосири кишоварзӣ ва усулҳои кишоварзӣ мебошад. Он истифодаи системаҳои самараноки обёрӣ, татбиқи механизатсия ва автоматикунонии равандҳои коркарди хок, инчунин истифодаи нуриҳо ва муҳофизати растаниҳо барои баланд бардоштани ҳосилнокӣ ва сифати маҳсулоти кишоварзиро дар бар мегирад.

Гуфта шуд, ки Тоҷикистон дорои захираҳои маҳдуди замин аст, бинобар ин барои таъмини худтаъминкунии озуқаворӣ ва коҳиш додани вобастагӣ аз воридоти ғизо ин захираҳоро моҳирона идора кардан зарур аст.

Бояд гуфт, ки машғулияти такмили ихтисос ба шунавандагон оид ба истифодаи беҳтар ва самараноки захираи замин донишҳои нави назариявӣ медиҳад.

АКС: Академияи идоракунии давлатии назди Президенти Ҷумҳурии Тоҷикистон