СОЛИ МАЪРИФАТИ ЭКОЛОГӢ. Зимни гузаронидани ҳашари «Тозагии ҳаво» зиёда аз 1900 нақлиёти ифлос сабт шуд

ДУШАНБЕ, 14.04.2024 /АМИТ «Ховар»/. Дар семоҳаи якуми соли 2024 зимни гузаронидани ҳашари «Тозагии ҳаво» аз ҷониби Сарраёсати ҳифзи муҳити зист дар шаҳри Душанбе ва шуъбаи Раёсати экологӣ ва сайёҳии Вазорати корҳои дохилии Ҷумҳурии Тоҷикистон 1904 ҳолати ҳаракати нақлиёти ифлос, 57 ҳолати пошхӯрии бор дар нақлиёт ва ҳаракати нақлиёти ифлос дар роҳҳо сабт шуда, ронандагони воситаҳои нақлиёт ба ҷавобгарии маъмурӣ кашида шуданд.

Тавре ба АМИТ «Ховар» дар Сарраёсати ҳифзи муҳити зист дар шаҳри Душанбе хабар доданд, бо мақсади амалишавии қарори Раиси шаҳри Душанбе дар бораи Соли маърифати экологӣ эълон намудани соли 2024 дар ҳамкории муштарак бо шуъбаи Раёсати экологӣ ва сайёҳии Вазорати корҳои дохилии Ҷумҳурии Тоҷикистон дар шаҳри Душанбе давоми 3 моҳ барои пешгирӣ намудани қонуншиканиҳо дар самти муҳити зист, махсусан ҳифзи ҳавои атмосфера, таъмини тозагии роҳҳо, коҳиш додани партоиши партовҳо ба атмосфера, покизагии муҳити зист аз партовҳо якчанд чорабиниҳо гузаронида шуданд.

Дар даромадгоҳи чор дарвозаи ба пойтахт воридшаванда нозирони шуъбаи Раёсати экологӣ ва сайёҳии Вазорати корҳои дохилии Ҷумҳурии Тоҷикистон дар шаҳри Душанбе фаъолият намуда, бо дастгоҳҳои махсус заҳрнокии партови сӯзишвории (СО2) воситаҳои нақлиётро мавриди ташхис қарор дода, 994 ҳолати қонуншиканиро сабт намуданд.

Давоми се моҳи имсол аз ҷониби Сарраёсати ҳифзи муҳити зист ва шуъбаи Раёсати экологӣ ва сайёҳӣ ба миқдори 902 килограмм моҳӣ мусодира гашта, нисбат ба шаҳрвандон санади маъмурӣ тартиб дода шуд.

Баҳри тоза нигоҳ доштани манбаъҳои обӣ, махсусан дар соҳили дарёҳо назорати давлатӣ пурзӯр гашта, бо дастрасии моддаи 177 нисбат ба қонуншиканиҳои ошкоргашта 23 санади маъмурӣ тартиб дода шуд.

АКС: Сарраёсати ҳифзи муҳити зист дар шаҳри Душанбе