Дар Душанбе нуқтаи дигари нерудиҳии электромобилҳо мавриди баҳрабардорӣ қарор гирифт
ДУШАНБЕ, 29.05.2024. /АМИТ «Ховар»/. Бо дастуру супоришҳои Раиси шаҳри Душанбе муҳтарам Рустами Эмомалӣ барои гузариш ба иқтисоди “сабз” ва консепсияи гузаштан ба нақлиёти барқӣ то давраи соли 2026 дар кӯчаи Ҷаббор Расулови пойтахт нуқтаи дигари нерудиҳии электромобилҳо мавриди баҳрабардорӣ қарор гирифт. Дар ин хусус АМИТ «Ховар» бо истинод ба шуъбаи иттилоотии дастгоҳи Раиси шаҳри Душанбе хабар медиҳад.
Масоҳати нуқтаи нерудиҳии электромобилҳо ҳазор метри мураббаъро ташкил дода, имкон дорад дар як вақт то 20 воситаи нақлиётро дар саҳни худ ҷо кунад. Як қисмати ин нуқта ҳамчун таваққафгоҳ ва паҳлуи дигари он барои нерудиҳии электромобилҳо пешбинӣ гардидааст. Дар ин нуқтаи хизматрасонӣ 6 таҷҳизоти барқӣ бо иқтидори 120 киловат нерудиҳӣ насб карда шудааст. Ҳар таҷҳизот бо ду хати нерудиҳӣ метавонад дар як вақт ду электромобилро бо неруи барқ таъмин намояд. Дар умум 6 таҷҳизоти барқӣ 12 электромобилро бо неруи барқ таъмин менамоянд.
Нуқтаи нерудиҳии электромобилҳо хатҳои уфуқӣ, камераҳои мушоҳидавӣ ва бунгоҳи назоратӣ дорад. Мавҷудияти инфрасохтор имкони сатҳи баланди хизматрасониро таъмин мекунад. Нуқтаи нерудиҳии электромобилҳо дар ноҳияи Сино дар байни роҳи автомобилгард ҷойгир аст. Воситаҳои нақлиёти барқӣ имкон доранд аз як тарафи роҳ ба нуқтаи хизматрасонӣ ворид ва хориҷ шаванд. Дар ин нуқтаи хизматрасонӣ дар баробари ронандагони электромобилҳои таксӣ шаҳрвандон ҳам метавонанд воситаҳои нақлиёти барқии худро бо неруи барқ таъмин намоянд.
Ҳамзамон дар пайи дастуру супоришҳои Раиси шаҳри Душанбе муҳтарам Рустами Эмомалӣ ҳамчунин бо ташаббуси ҶДММ «Сайёҳон» низ нуқтаи нерудиҳӣ мавриди истифода қарор гирифт.
Ёдрас мешавем, ки нуқтаи нерудиҳии электромобилҳо барои иҷрои муқаррароти Консепсияи гузаштан ба нақлиёти барқӣ дар шаҳри Душанбе мавриди истифода қарор гирифт. Консепсияи мазкур дар заминаи «Барномаи рушди нақлиёти барқӣ дар Ҷумҳурии Тоҷикистон барои солҳои 2023-2028», ки 31 октябри соли 2022 бо Қарори Ҳукумати Ҷумҳурии Тоҷикистон қабул гардид, таҳия ва мавриди амал қарор гирифт.
АКС: Шуъбаи иттилоотии дастгоҳи Раиси шаҳри Душанбе
Ҳаракати ҳама гуна воситаҳои нақлиёт дар баъзе кӯчаҳои марказии пойтахт муваққатан қатъ мегардад
Душанбе — пойтахти Тоҷикистон ба яке аз шаҳрҳои пешрафтаи сайёҳии дунё табдил ёфтааст
Иҷлосияи дуюми Маҷлиси вакилони халқи шаҳри Душанбе, даъвати ҳафтум баргузор гардид
Иҷлосияи дуюми Маҷлиси вакилони халқи шаҳри Душанбе, даъвати ҳафтум оғоз гардид
Имрӯз иҷлосияи дуюми Маҷлиси вакилони халқи шаҳри Душанбе, даъвати ҳафтум баргузор мегардад
Дар баъзе аз кӯчаҳои пойтахт ҳаракати воситаҳои нақлиёт муваққатан қатъ карда мешавад
Дар Душанбе 37 фоизи кӯдакони синни томактабӣ ба таълиму тарбияи аввалия фаро гирифта шудаанд
15 июл иҷлосияи дуюми Маҷлиси вакилони халқи шаҳри Душанбе, даъвати ҳафтум баргузор мегардад
ТАЪТИЛИ БОФАРОҒАТ. Дар Душанбе 47 майдончаи тандурустиву солимгардонӣ ташкил гардидааст
ҶОМИ РАИСИ ШАҲРИ ДУШАНБЕ. Мусобиқаи футболи хурд байни кормандони вазорату идораҳо ҷамъбаст шуд
