Дар Душанбе рушди соҳибкории занон, мушкилот ва роҳҳои ҳалли онро баррасӣ намуданд
ДУШАНБЕ, 29.05.2024 /АМИТ «Ховар»/. Имрӯз дар Маркази тадқиқоти стратегии назди Президенти Ҷумҳурии Тоҷикистон таҳти унвони «Масъалаҳои рушди соҳибкории занон: вазъ, мушкилот ва роҳҳои ҳалли он» конфронси илмӣ–амалӣ доир гардид, иттилоъ медиҳад АМИТ «Ховар» бо истинод ба ин марказ.
Дар конфронси илмӣ–амалӣ вазъи кунунии тамоюлҳои рушди фаъолияти соҳибкории занон, дастрасии онҳо ба имтиёзҳою грантҳо ва захираҳои қарзию молиявӣ, мушкилоту монеаҳои ҷойдошта дар ин самт ва дар ин замина пешниҳоду тавсияҳо барои рушди соҳибкории занон дар шароити имрӯза баррасӣ гардид.
Гуфта шуд, ки соли 2023 дар мамлакат занҳои соҳибкор зиёда аз 85 ҳазор нафарро ташкил намуданд, ки нисбат ба панҷсоли қаблӣ тақрибан 5-10 дарсад зиёд мебошад.
Ҷумҳурии Тоҷикистон татбиқи пайвастаи ислоҳоти соҳаҳои гуногуни ҳаёти иқтисодиии ҷомеа, бахусус соҳибкориро яке аз омилҳои пешбарандаи рушди босубот ва амалигардонии ҳадафҳои стратегии мамлакат медонад. Вобаста ба ин, муосидат ба рушди соҳибкории занон низ яке аз ҳадафҳои рушди иқтисодии мамлакат дониста шуда, дар ин самт пайваста тадбирҳои муфид амалӣ мешаванд.
Ҳукумати мамлакат соҳаи соҳибкориро дар «Стратегияи миллии рушди Ҷумҳурии Тоҷикистон барои давраи то соли 2030» ҳамчун неруи пешбарандаи рушди босуботи иқтисодӣ, воситаи асосии таъмин кардани ҳадафҳои миллӣ ва дар ин замина муҳайё намудани шароит барои ҳалли масъалаҳои марбут ба дастгирии соҳибкорӣ, бахусус тамоюлҳои рушди фаъолияти соҳибкории занон муайян кардааст.
Дар суханрониҳо ба масъалаҳои арзёбии вазъ ва тамоюлҳои рушди фаъолияти соҳибкории занон, арзёбии сатҳи бархӯрдории занҳои соҳибкор аз имтиёзу сабукиҳои ҷойдошта ва захираҳои қарзию молиявӣ, мушкилоту монеаҳои ҷойдошта дар самти таъмини рушди соҳибкории занон ва амсоли ин диққат дода шуд.
Бояд гуфт, ки дар марҳилаи соҳибистиқлолии мамлакат таваҷҷуҳ ба мақому манзалати занон яке аз самтҳои сиёсати муҳими давлатдории муосири тоҷикон маҳсуб мешавад. Имрӯз занон-модарони тоҷик ҳамсафу ҳамқадами замон буда, рисолати модариву қарзи шаҳрвандиашонро дар густаришу такмил додани арзишҳои волои инсонӣ, бахусус дар руҳияи баланди ватандӯстӣ тарбия намудани фарзандон, пос доштани арзишҳои миллӣ, баланд бардоштани маънавиёти ҷомеа бо камоли масъулият адо менамоянду сазовори эҳтироми аҳли ҷомеа мебошанд. Пешвои миллат муҳтарам Эмомалӣ Раҳмон иброз намудаанд, ки «занон дар ҷомеаи мо қувваи бузург мебошанд ва мо ба неруву ташаббусҳои онҳо ҳамеша эътимод дорем».
Имрӯз занони тоҷик дар ҳама касбу кор пешсафу саҳмгузор буда, дар иқтисодиёти мамлакат низ саҳми бориз доранд. Ҳукумати мамлакат давоми солҳои соҳибистиқлолӣ бо мақсади дастгирии занон ва баланд бардоштани мавқеи онҳо дар ҷомеа тадбирҳои заруриро амалӣ намуд.
АКС: АМИТ «Ховар»








Дар Пекин масъалаҳои рушди қонунгузорӣ ва таҷрибаи муосири давлатдорӣ баррасӣ гардиданд
Дар Москва ҷаласаи 11-уми Алянси Авруосиёии омбудсменҳо баргузор гардид
Бахшида ба Рӯзи Президент дар вилояти Суғд роҳпаймоии идона баргузор шуд
Ҳамкории ҳуқуқии Тоҷикистону Чин дар Пекин баррасӣ гардид
Рӯзи Президентро дар ноҳияи Ёвон бо баргузории чорабиниҳои гуногун таҷлил намуданд
Ба муносибати Рӯзи Президент ва Иҷлосияи XVI Шурои Олӣ дар бинои Ҳукумати Ҷумҳурии Тоҷикистон ҷамъомад баргузор шуд
Дар мавзуи «Низоми идоракунии президентӣ ва таъмини амнияти давлатӣ» ҳамоиши илмӣ-амалӣ доир шуд
Дар мақомоти Ваколатдор оид ба ҳуқуқи инсон бахшида ба Рӯзи Президенти Тоҷикистон ҳамоиш баргузор шуд
СИЁСАТИ ХОРИҶИИ ТОҶИКИСТОН – НАМУНАИ ДИПЛОМАТИЯИ МУТАВОЗИНУ СОЗАНДА. Эҳдо ба Рӯзи Президенти Ҷумҳурии Тоҷикистон
Дар Душанбе таҳти унвони «Президент — симои миллат ва рамзи давлат» ҳамоиши ҷумҳуриявӣ доир шуд
РӮЗИ ПРЕЗИДЕНТ ВА ТАҶАССУМИ ИРОДАИ ТАЪРИХИИ МИЛЛАТ ДАР БУНЁДИ ДАВЛАТДОРИИ НАВИН. Мулоҳизаҳои академик Фарҳод Раҳимӣ
ИҶЛОСИЯИ XVI – ЗАМИНАИ ТАЪРИХИИ ТАҲКИМИ ДАВЛАТДОРӢ, ҚОНУНИЯТ ВА АДОЛАТИ СУДӢ. Андешаҳо дар ин маврид






