Дар шаҳри Душанбе шабакаи байналмилалии беморхонаҳо «ACIBADEM» ифтитоҳ гардид

ДУШАНБЕ, 06.05.2024 /АМИТ «Ховар»/.  Дар шаҳри Душанбе намояндагии шабакаи байналмилалии беморхонаҳои туркӣ «ACIBADEM» ифтитоҳ гардид. Дар ин хусус АМИТ «Ховар» хабар медиҳад.

Тавре роҳбари шабакаи байналмилалии беморхонаҳо «ACIBADEM» Манучеҳр Назаров дар суҳбат бо мо иброз дошт, шабака дар 29 давлати ҷаҳон ва 53 шаҳр 50 намояндагӣ кушодааст  ва он яке аз бузургтарин шабакаҳои тиббии ҷаҳон  маҳсуб шуда, бo муассисаҳои тиббии Амрико ва Аврупо рақобат мекунад.

Беморони хориҷӣ ба намояндагиҳои «ACIBADEM» муроҷиат менамоянд, то ташхиси худро муайян кунанд ва дар беморхонаҳои «ACIBADEM» табобат гиранд.

Беморхонаҳои «ACIBADEM» дар ҳама самтҳои соҳаи тиб бо истифода аз технологияҳои инноватсионии тиббӣ, аз ҷумла ташхис ва табобати баланди касбӣ дар соҳаи онкология, пайвандсозии узвҳо, эстетика, ЭКО, нейрохирургия, ортопедия, кардиология, гинекология, тибби варзишӣ ва ғайра доираи васеи хизматрасониро пешкаш мекунанд.

Иброз гардид, ки ҳар шаҳрванди Ҷумҳурии Тоҷикистон барои табобати босамар ва бароҳат метавонад ба намояндагии шабака муроҷиат намуда, аз хизматрасонии он истифода барад.

Кормандони намояндагӣ дар тарҷумаи ҳуҷҷатҳои тиббӣ, ташкили конфронсҳои онлайнӣ бо табибон ва гирифтани хулосаи тиббии дуюми ройгон мусоидат мекунанд. Инчунин, дар намояндагӣ ба беморон дар таҳияи тамоми ҳуҷҷатҳои зарурӣ кумак расонида мешавад, зеро ҷарроҳиҳо танҳо дар беморхонаҳои «ACIBADEM» гузаронида мешаванд.

Гуфта шуд, ки шабака  соли 1991 таъсис ёфта,  24 беморхона  ва 18 маркази тиббиро дар Туркия, Нидерландия, Македония, Булғористон ва Сербия фаро мегирад ва ҳамаи онҳо бо таҷҳизоти  тиббии насли навтарин муҷаҳҳаз гардидаанд.

Ҳамасола  дар беморхона ва марказҳои тиббии он ба зиёда аз 5 миллион бемор хизмати тиббӣ расонида мешавад.

Барои маълумоти иловагӣ метавон ба намояндагии гурӯҳи ширкатҳои «ACIBADEM» дар шаҳри Душанбе дар суроғаи: кӯчаи Садриддин Айнӣ 46/2, тел.:+992 40 500 001 муроҷиат намуд.

АКС: АМИТ «Ховар»