Дар шаҳри Кӯлоб мустаҳкам намудани соҳили дарёҳо ва селпартоҳо идома дорад

Май 26, 2024 11:40

КӮЛОБ, 26.05.2024 /АМИТ «Ховар»/. Бо мақсади бартарафсозӣ ва пешгирии ҳодисаҳои табиӣ ва амалӣ намудани тадбирҳои соҳилмустаҳкамкунӣ дар мавзеъҳои хавфноки ҷамоатҳои шаҳру деҳоти Кӯлоб ҷаласаи комиссияи ҳолатҳои фавқулодаи шаҳр бо иштироки намояндагони раёсати Кумитаи ҳолатҳои фавқулода ва мудофиаи гражданӣ дар вилояти Хатлон ва роҳбарияти шаҳр баргузор гардид, хабар медиҳад мухбири минтақавии АМИТ «Ховар».

Таъкид гардид, ки ҳадафи ҷаласа санҷиши омодагии ҳамаи ташкилоту муассисаҳо баҳри пешгирӣ намудани хавфи офатҳои табиӣ буд. Ҳамчунин масъалаи соҳилмустаҳкамнамоӣ ва дигар тадбирҳои пешгирикунандаи мавзеъҳои хавфнок баррасӣ гардид.

Дар шаҳру ҷамоатҳои деҳоти Кӯлоб давоми ҳафтаи охир вобаста ба мустаҳкам намудани соҳили дарёҳо ва селпартоҳо бо саҳми Мақомоти иҷроияи ҳокимияти давлатии шаҳр Комиссияи ҳолатҳои фавқулода ташкил гардида, бо ҷалби техникаву механизмҳои корӣ ва дигар маводи зарурӣ фаъолият дорад.

Тибқи маълумот, дар шаҳру деҳоти Кӯлоб 32 мавзеъи осебпазир ва 6 мавзеи ниҳоят хавфнок мавҷуд аст. Ҳамзамон гурӯҳҳои кории ташкилгардида дар қитъаҳои муайян фаъолият намуда, хоку гил ва сангу шағали дар натиҷаи бориши борону сел ҷамъшударо аз дохили каналу дарёҳо ва ҷӯйборҳои кӯчаву маҳаллаҳо тавассути техникаҳои пуриқтидори корӣ тоза намуда, хавфи ҳодисаҳои табииро барои давраи оянда аз ин қитъаҳо бартараф доранд.

Ҳоло дар мавзеъҳои хавфноки ҷамоатҳои шаҳру деҳоти Кӯлоб, аз ҷумла барои тоза намудани маҷрои Девонасой дар маҳаллаи Хати роҳ 5 техника, дар деҳаи Сангпари Ҷамоати деҳоти Зиракӣ барои тоза намудани селпарто ва ҷўйборҳои обрав 4 техника, ҳамчунин дар мавзеи дигари ҳудуди ин ҷамоат дар назди пули мошингузари самти Фурудгоҳи байналмилалии Кӯлоб барои барқарорсозии пул ва баровардани сангу шағал 8 техника, дар маҳаллаи Суғдиён барои тоза намудани канали Панҷосиёби боло тариқи ҳашарҳои дастҷамъона 3 техника, дар Ҷамоати деҳоти Кӯлоб, дар деҳаи Лағмон-2 барои дар дарёчаи Кўлоб гузоштани тахтасангҳои оҳану бетонӣ ва ба роҳ мондани корҳои заминӣ дар ин мавзеъ 6 техника ҷалб гардида, дар ин самт корҳои муайяншуда бо сифати баланд идома доранд.

Натиҷаи таваҷҷуҳ ва ғамхориҳои Ҳукумати мамлакат нисбат ба сокинон аст, ки имрўз тамоми имконот ва иқтидори зарурӣ ба рафъи хатари ҳодисаҳои табиӣ ва таъмини осоиштагии мардум равона гардида, дар мавзеъҳои хавфнок корҳои соҳилмустаҳкамнамоӣ ва бартарафсозӣ бо маром идома доранд.

АКС: АМИТ «Ховар»

Май 26, 2024 11:40

Хабарҳои дигари ин бахш

Дар ноҳияи Данғара вохӯрии масъулин бо сокинон бо усули «Маҳал ба маҳал» ва «Деҳа ба деҳа» баргузор гардид
Имрӯз дар баъзе аз минтақаҳои Тоҷикистон хавфи омадани сел боқӣ мемонад
ҲАР КАС БА ЗАБОНИ ХУД СУХАНДОН ГАРДАД. Китобҳо дар нигоҳ доштани забон нақши аввалияро мебозанд
Дар кӯчаҳои Хоруғ 150 қуттии муосир барои партовҷамъкунӣ гузошта шуд
Имрӯз дар Тоҷикистон ҳавои тағйирёбанда пешгӯӣ мешавад
Имрӯз дар баъзе минтақаҳои Тоҷикистон хавфи омадани сел боқӣ мемонад
Дар Душанбе ҷаласаи муштараки Платформаи миллии коҳиши хатари офатҳои табиӣ баргузор шуд
Дар Суғд саҳми шуроҳои ҷамъиятиро дар амалишавии ислоҳоти милитсия баррасӣ намуданд
Имрӯз дар Тоҷикистон ҳаво то 38 дараҷа гарм мешавад
СОЛИ МАЪРИФАТИ ҲУҚУҚӢ. Роҳбарияти Раёсати Вазорати корҳои дохилӣ дар вилояти Хатлон бо фаъолзанони шаҳри Кӯлоб вохӯрӣ намуд
23 июл Анҷумани ғайринавбатии Ҳизби сотсиалистии Тоҷикистон доир мешавад
20 июл Анҷумани ғайринавбатии Ҳизби ислоҳоти иқтисодии Тоҷикистон баргузор мегардад