Муовини Сарвазири Тоҷикистон Сулаймон Зиёзода дар ноҳияи Мастчоҳ бо вазъи соҳаи кишоварзӣ шинос шуд

ДУШАНБЕ, 11.05.2024 /АМИТ «Ховар»/. 10 май муовини Сарвазири Ҷумҳурии Тоҷикистон Сулаймон Зиёзода дар ноҳияи Мастчоҳ бо вазъи соҳаи кишоварзӣ, аз ҷумла кишти зироат, фаъолияти гармхонаҳо ва ҳолати кирмакпарварӣ шинос гардид. Дар ин хусус ба АМИТ «Ховар» Дафтари матбуоти Раиси ноҳияи Мастчоҳ хабар доданд.

Муовини Сарвазири мамлакат нахуст дар хоҷагии таълимии Коллеҷи кишоварзии ноҳия бо парвариши кишти зироати барвақтӣ, аз ҷумла гандуму картошка ва сабзиши пахта шинос шуд.

Иттилоъ дода шуд, ки майдони умумии заминҳои хоҷагии таълимии Коллеҷи кишоварзӣ 89,14 гектар буда, имсол мутахассисон дар 46 гектари он пахта, 7 гектар гандум, 5 гектар полезӣ, 3,14 гектар чормағзи заминӣ, 3 гектар маккаи дон, 2 гектар картошкаи барвақтӣ, 2 гектар офтобпараст ва дар 21 гектар зироати хӯроки чорво кишт намудаанд.

Сулаймон Зиёзода ба роҳбарияти коллеҷ барои рушди соҳаи кишоварзӣ, аз ҷумла парвариши гандум, пахта ва дигар намуди зироат дастуру тавсияҳои муфид дода, таъкид сохт, ки муассисаи давлатии таълимӣ барои баланд бардоштани ҳосилнокии хок ва гирифтани ду – се ҳосил дар як сол бояд бо мутахассисони варзидаи соҳаи кишоварзӣ ҳамкории судманд намояд.

Ҳамзамон ба масъулини соҳаи кишоварзии ноҳия ва раисони ҷамоатҳои шаҳраку деҳот вобаста ба иҷрои саривақтии дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба самаранок ва оқилона истифода бурдани заминҳо, гирифтани ду-се ҳосил аз як замин, ба кишти пурра фаро гирифтани заминҳои наздиҳавлигӣ ва хоҷагиҳои ёрирасон, инчунин озуқадиҳӣ ва тезонидани сабзиши пахта ва дигар масъалаҳои марбут ба соҳаи кишоварзӣ супоришҳо дода шуд.

Дар идома Муовини Сарвазири мамлакат бо фаъолияти гармхонаҳои  хоҷагии деҳқонии «Восеъ» шинос гардид.

Иттилоъ дода шуд, ки дар гармхонаҳо помидор ва дигар сабзавот кишут парвариш карда мешавад. Ба иттилои масъулин, дар ҳосили аввал аз гармхонаҳо зиёда аз 25 тонна помидор ба даст оварда мешавад. Роҳбарияти хоҷагӣ ният дорад, ки баъди ҳосили аввал дар моҳи июн дар гармхонаҳо боз помидор кишт намуда, ду ҳосил ба даст орад.

Ташкили чунин гармхонаҳои замонавӣ иқдоми заруриву саривақтӣ арзёбӣ гардида, барои истифодаи ин таҷриба дар дигар минтақаҳои ноҳия дар назди масъулини соҳаи кишоварзӣ вазифагузорӣ карда шуд.

Ҳамчунин дар Ҷамоати шаҳраки Бӯстон Сулаймон Зиёзода бо рафти корҳои кирмакпарварӣ дар оилаи Абдулло Маҳмадқулов шинос шуд.

Дар мавсими имсола ба оилаҳое, ки таҷрибаи кирмакпарварӣ доранд, 150 қуттӣ кирмак тақсим гардида, айни замон парвариши он идома дорад.

Дар ноҳияи Мастчоҳ зиёда аз 200 гектар замини тутзор мавҷуд аст, ки он барои кирмакпарварӣ истифода мешавад.

Бояд гуфт, ки кирмакпарварӣ аз соҳаҳои афзалиятноки кишоварзӣ маҳсуб ёфта, он барои рушди саноати сабук ва истеҳсоли матоъҳои аз ҷиҳати экологӣ тоза нақши зарурӣ дорад.

АКС: Дафтари матбуоти Раиси ноҳияи Мастчоҳ