«ОИЛА-МАКОНИ МЕҲРУБОНӢ». Дар шаҳри Норак Рӯзи байналмилалии оила таҷлил карда шуд

Май 15, 2024 20:29

НОРАК, 15.05.2024. /АМИТ «Ховар»/. 14 май дар Қасри фарҳанги шаҳри Норак дар фазои мутантан Рӯзи байналмилалии оила таҷлил гардид. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Норак иттилоъ доданд.

Раиси шаҳри Норак Фирӯза Шарифӣ иброз дошт, ки «оила ва суннатҳои оиладорӣ дар ойинҳои мардумии тоҷик ба фарҳанг ва маърифати миллати куҳанбунёдамон асос ёфта, он ниҳоди муқаддас эътироф гардидааст. Мақсад аз таҷлили ин рӯз устувор гардонидани оилаҳо, баланд бардоштани арзишҳои оилавӣ ва ҳалли мушкилоти мавҷудаи он мебошад. Зеро беҳтарин арзишҳои инсонӣ, аз қабили муҳаббату садоқат, самимияту вафодорӣ ва ҳамдигарфаҳмиву таҳаммулгароӣ маҳз дар оилаи солим ташаккул меёбанд».

Таъкид гардид, ки оила ҳамчун унсури асосии ҷомеа аз қадимулайём ҳамеша нигаҳдорандаи беҳтарин арзишҳои инсонӣ, фарҳанг, маданият, идомаи таърихии наслҳо ва омили мустаҳками инкишоф буд ва мемонад. Мафҳуми оилаву хонадорӣ барои миллати тоҷик намунаи шоистаи суннатҳои баланди ниёгон мебошад.

Тавре Пешвои миллат муҳтарам Эмомалӣ Раҳмон дар яке аз суханрониҳояшон таъкид намудаанд: «Давлат дар доираи талаботи Конститутсия ҳифзи иҷтимоии аҳолӣ, аз ҷумла ҳимояи оила, ҳифзи кӯдакони ятиму маъюб ва таҳсилу табобати шаҳрвандонро кафолат дода, оиларо ҳамчун асоси ҷамъият ҳимоя мекунад».


Оила бақои давлату ҷамъият маҳсуб шуда, зерсутун ва пойдевори тарбияи насли наврас аз он сарчашма мегирад. Яке аз масъалаҳои мубрами ҳаёти имрӯзаи ҷомеа бунёди оилаи солим ва тарбияи насли ояндасоз ба шумор меравад. Зеро ҳалли дурусти он ба тарзи ҳаёт ва ҷараёни инкишофи инсон ва рушди ҷомеа вобаста аст.

Зимни ҳамоиш бо аъзои оилаҳои барӯманди шаҳр суҳбати озод барпо карда шуда, масъалаҳои мубрами ҳаёти имрӯзаи ҷомеа доир ба бунёди оилаи солим ва тарбияи насли ояндасоз, ҳалли дурусти масъалаю мушкилоти оилавӣ, ҷалби ҷавонон ба зиндагии хуш, ҷараёни инкишофи зиндагӣ ва рушди ҷомеа баррасӣ шуданд.

Бахшида ба Рӯзи байналмилалии оила ба ду ҷуфт навхонадорон шаҳодатномаи ақди никоҳ, ба волидайни тифлакони навзод шаҳодатномаи таваллуд, ба оилаҳои барӯманди шаҳр туҳфаҳои хотиравӣ супорида шуданд.

Ҳамчунин ба нафароне, ки дар рушди соҳаи гуногуни ҷомеа саҳми арзанда гузошта, ҳамчун оилаҳои намунавӣ солиёни зиёд дар тарбияи насли шоистаи замон ва фарзандон муваффақ ҳастанд, туҳфаҳои хотиравии Мақомоти иҷроияи ҳокимияти давлатии шаҳри Норак тақдим гардид.

АКС: Мақомоти иҷроияи ҳокимияти давлатии шаҳри Норак

Май 15, 2024 20:29

Хабарҳои дигари ин бахш

Дар Душанбе доир ба нақши оила дар рушди сармояи инсонӣ конференсияи байналмилалӣ доир шуд
АЗ ТАШАББУСҲОИ БАЙНАЛМИЛАЛӢ ИФТИХОР ДОРЕМ. Дар Донишгоҳи технологии Тоҷикистон Рӯзи ҷаҳонии футболро таҷлил намуданд
«МегаФон Тоҷикистон» интернет туҳфа менамояд
Ҳилоли Аҳмари Эрон дар бораи марги президент ва вазири корҳои хориҷии Ҷумҳурии Исломии Эрон иттилоъ дод
Изҳороти матбуотии Вазорати корҳои хориҷии Ҷумҳурии Тоҷикистон
Имрӯз дар Тоҷикистон ҳавои тағйирёбанда пешгӯӣ мешавад
Яке аз чархболҳои корвон бо ҳузури Президенти Эрон фуруди сахт анҷом дод
«МАОРИФ-АСОСИ ТАКМИЛ ВА РУШДИ ИНСОН». Таҳти чунин унвон китоби нав нашр гардид
Имрӯз дар ноҳияҳои алоҳидаи кӯҳию доманакӯҳии Тоҷикистон борони кӯтоҳмуддат меборад
Имрӯз дар Тоҷикистон ҳавои тағйирёбанда пешгӯӣ мешавад
«ТОҶИКИСТОНИ МАН!». Дар шаҳри Ҳисор даври дуюми маҳфил-озмун ҷамъбаст карда шуд
Имрӯз дар баъзе ноҳияҳои Тоҷикистон борон меборад