«ОИЛАИ СОЛИМ-ПОЙДЕВОРИ ҶОМЕИ СОЛИМ». Дар Душанбе доир ба он 4 иқдом гузаронида шуд

ДУШАНБЕ, 15.05.2024. /АМИТ «Ховар»/. Имрӯз дар Боғи Куруши Кабири шаҳри Душанбе бо ибтикори Кумитаи кор бо занон ва оилаи назди Ҳукумати Ҷумҳурии Тоҷикистон таҳти унвони «Оилаи солим – пойдевори ҷомеи солим» иқдоми тарғиботию ташвиқотӣ баргузор гардид. Дар ин хусус АМИТ «Ховар» хабар медиҳад.

Мудири бахши иттилооти Кумитаи кор бо занон ва оилаи назди Ҳукумати Ҷумҳурии Тоҷикистон Сабоҳат Рустам дар суҳбат бо мо иброз намуд, ки «Кумита ба шарафи Рӯзи байналмилалии оила силсилачорабиниҳо доир намуд. Бо истифода аз ҳузури сокинон ва меҳмонони пойтахт 4 ташаббус: «Оилаи солим – пойдевори ҷомеи солим», «Тоҷикона мепӯшем», «Маърифати ҳуқуқӣ» ва «Пешгирии зӯроварӣ дар оила» баргузор карда шуд. Инчунин вобаста ба муҳтавои чорабиниҳо ба сокинон дастурҳои методӣ ва варақаҳои иттилоотӣ тақсим кардем».

Ҳамзамон дар доираи ин чорабинӣ ба хотири арҷгузорӣ ба фарҳанг, тамаддун ва либоси миллӣ намоиш- фурӯши маҳсули дасти занону духтарони тоҷик, инчунин иқдоми «Тоҷикона мепӯшем» доир шуд, ки дар он занону духтарон аз вазорату кумитаҳо, донишгоҳҳои мамлакат иштирок намуданд.

Бояд гуфт, ки дар иқдоми тарғиботию ташвиқотӣ таҳти унвони «Оилаи солим – пойдевори ҷомеи солим» зиёда аз 350 варақаи таблиғотӣ ба донишҷӯёну омӯзгорон тақсим гардид. Дар онҳо мафҳуми оилаву оиладорӣ, баланд бардоштани маърифати шаҳрвандию сиёсӣ ва ба ин васила омода намудани ҷавондухтарон ба ҳаёти мустақилона, инчунин пешгирӣ намудани равандҳое, ки ба пошхӯрии оила оварда мерасонанд, инъикос шудаанд.

Ёдовар мешавем, ки Рӯзи байналмилалии оила, ки соли 1993 бо қарори Ассамблеяи генералии Созмони Милали Муттаҳид эълон гардидааст, ҳамасола 15 май доир мешавад.

София ШОИК,
АМИТ «Ховар»

АКС: Кумитаи кор бо занон ва оилаи назди Ҳукумати Ҷумҳурии Тоҷикистон