РӮЗИ ҶАҲОНИИ ФУТБОЛ. Сокинони шаҳри Хоруғ ин пешниҳодро ҷонибдорӣ менамоянд

ДУШАНБЕ, 14.05.2024 /АМИТ «Ховар»/. Сокинони шаҳри Хоруғ бо  баргузории ҳамоиш ҳамовозиашонро аз пешниҳоди Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, Президенти Федератсияи футболи Тоҷикистон, Президенти Ассотсиатсияи футболи Осиёи Марказӣ (CAFA) муҳтарам Рустами Эмомалӣ ба Созмони Милали Муттаҳид оид ба қабули Қатъномаи махсуси Маҷмаи умумии СММ барои эълон намудани Рӯзи ҷаҳонии футбол иброз намуданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии Вилояти Мухтори Кӯҳистони Бадахшон хабар медиҳад.

Дар ҳамоиш гуфта шуд, ки  ин рӯйдоди фараҳбахш аз ташаббусҳои ҷаҳонии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маншаъ гирифта, нуфуз ва эътибори Тоҷикистонро ҳамчун мамлакати ташаббускор ва созанда дар ҳалли масъалаҳои мубрами башарият боз ҳам боло мебарад.

Гуфта шуд, ки Ҷумҳурии Тоҷикистон дар қатори дигар давлатҳо барои рушди футбол, ки бозии рақами яки ҷаҳон эътироф гардидааст, тамоми имкониятро муҳайё намудааст. Аз ҷумла, давоми солҳои соҳибистиқлолии мамлакат бо қабули «Барномаи рушди футбол дар Ҷумҳурии Тоҷикистон» барои ду марҳила — солҳои 2012-2016 ва 2017-2021 имконияти васеъ барои ҷалби ҳарчи бештари аҳолӣ ба футбол, таъмиру навсозии иншооти соҳа, ба майдон овардани истеъдодҳои нав аз байни наврасону ҷавонон ва тавсеаи футболи касбӣ дар мамлакат фароҳам гардид.

Иттилоъ дода шуд, ки имрӯз дар шаҳру ноҳияҳои вилоят бештар аз 30 толору майдончаи варзишӣ мавриди истифода қарор дода шудаанд. Инчунин  то соли 2030 дар деҳаҳое, ки аз 100 хоҷагӣ зиёд доранд, бунёди 81 майдонча ва 87 толори варзишӣ ба нақша гирифта шудааст.

АКС: Мақомоти иҷроияи ҳокимияти давлатии Вилояти Мухтори Куҳистони Бадахшон