Сауд ибн Ҳаммуд Ал-Ҳабсӣ талошҳои Тоҷикистонро намунаи олӣ дар самти ҳалли мушкилоти марбут ба об ва тағйирёбии иқлим арзёбӣ намуд

ДУШАНБЕ, 13.06.2024 /АМИТ «Ховар»/. Талошҳои Тоҷикистон намунаи олӣ дар самти ҳалли мушкилоти марбуот ба об ва тағйирёбии иқлим мебошанд. Ин матлабро Вазири кишоварзӣ, моҳидорӣ ва захираҳои оби Салтанати Уммон, доктор Сауд ибн Ҳаммуд Ал-Ҳабсӣ баён намуд.

Тавре ба АМИТ «Ховар» дар Вазорати энергетика ва захираҳои оби Ҷумҳурии Тоҷикистон иттилоъ доданд, 12 июн дар ҳошияи Конфронси сеюми байналмилалии сатҳи баланд оид ба татбиқи Даҳсолаи байналмилалии амал «Об барои рушди устувор, солҳои 2018-2028» дар шаҳри Душанбе  вохӯрии Вазири энергетика ва захираҳои оби Ҷумҳурии Тоҷикистон Далер Ҷумъа бо Вазири кишоварзӣ, моҳидорӣ ва захираҳои оби Салтанати Уммон доир гардид.

Зимни мулоқот  мусоҳибон масоили ҳамкории давлатҳо дар соҳаи обро мавриди баррасӣ қарор доданд.

Инчунин ҷонибҳо доир ба масоили мубрами ҷомеаи ҷаҳонӣ, аз қабили тағйирёбии иқлим, таъсири он ба муҳити зист ва норасоии оби ошомиданӣ табодули андеша намуданд.

АКС: Вазорати энергетика ва захираҳои оби Ҷумҳурии Тоҷикистон