Тоҷикистон ба 18 давлати ҷаҳон маҳсулоти кишоварзӣ содирот менамояд

ДУШАНБЕ, 07.06.2024 /АМИТ «Ховар»/.  Дар семоҳаи аввали имсол аз Тоҷикистон ба 18 давлати ҷаҳон маҳсулоти кишоварзӣ дар ҳаҷми 84,3 ҳазор тонна содирот гардидааст, иттилоъ доданд ба АМИТ «Ховар» дар Вазорати кишоварзии мамлакат.

Аз маҳсулоти содиротгардида 74,2 фоиз ба мамлакатҳои Иттиҳоди Давлатҳои Мустақил ва 25,8 фоиз ба давлатҳои хориҷии дур рост меояд. Маҳсулоти содиротшуда  нисбат ба ҳамин давраи соли 2023 26,2 ҳазор тонна ё 45 фоиз фоиз зиёд мебошад.

Маҳсулоти сабзавотӣ қариб ба 8 ҳазор тонна (аз ҷумла, пиёз 6,8 ҳазор тонна), меваҷот 1,1 ҳазор тонна (аз ҷумла ангур 510 тонна), меваи хушк 29,1 ҳазор тонна, лӯбиёгиҳо 120 тонна, маҳсулоти ширӣ, тухми паранда ва асали табиӣ 1,5 ҳазор тонна ва тухмиҳои равғандор, растаниҳои доругӣ 2,0 ҳазор тоннаро ташкил медиҳанд.

Нисбат ба ҳамин давраи соли 2023 содирот аз рӯи ҳаҷми сабзавот — 7,3 ҳазор тонна ё 13,6 маротиба (аз ҷумла пиёз 6,8 ҳазор тонна), меваи хушк — 10,8 ҳазор тонна, лубиёгиҳо — 120 тонна, маҳсулоти ширӣ, тухми паранда ва асали табиӣ 1,5 ҳазор тонна ё 154,5 маротиба ва тухмиҳои равғандору растаниҳои доругӣ 1,0 ҳазор тонна зиёд мебошад.

АКС: АМИТ «Ховар»