Ҷамолиддин Абдуллозода бо фаъолияти муассисаҳои тандурустии вилояти Хатлон шинос гардид

ДУШАНБЕ, 17.07.2024 /АМИТ «Ховар»/. 16 июл Вазири тандурустӣ ва ҳифзи иҷтимоии аҳолӣ Ҷамолиддин Абдуллозода ҷиҳати бартараф намудани мушкилоту камбудиҳои ҷойдошта ва дар ин замина боз ҳам беҳтар намудани сатҳу сифати хизматрасонии тиббӣ, ҳифзи иҷтимоии аҳолӣ бо фаъолияти «Маркази ҷумҳуриявии тавонбахшӣ ва будубоши доимии пиронсолон ва маъюбон дар ноҳияи Кӯшониён» ва Беморхонаи клиникии вилоятии ба номи Бурӣ Воҳидови шаҳри Бохтари вилояти Хатлон шинос гардид. Дар ин хусус ба АМИТ «Ховар» дар Вазорати тандурстӣ ва ҳифзи иҷтимоии аҳолии мамлакат иттилоъ доданд.

Вазири тандурустӣ ва ҳифзи иҷтимоии аҳолӣ ҳамчунин барои тақвияти корҳои ободонию  созандагӣ ва воқиф гардидан аз рафти хизматрасонии тиббӣ ба аҳолӣ бо беморон ва наздикони онҳо суҳбати озоду ошкоро намуд.

Ҷамолиддин Абдуллозода бо роҳбарияти муассисаҳои соҳа масъалаҳои вусъат бахшидани корҳои ободонию  созандагӣ, назорати вазъи санитарию эпидемиологӣ, риояи одоби муоширати табибон бо беморон ва баланд бардоштани сатҳи хизматрасонии тиббӣ ба аҳолӣ ва дигар масъалаҳои алоқаманди соҳаро баррасӣ намуда, ҷиҳати бартараф намудани мушкилоту камбудиҳои ҷойдошта ба масъулин дастуру супоришҳои мушаххас дод.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон