Ҷавонони тоҷик дар омӯзиши забони хориҷӣ аз Барномаи FLEX самаранок истифода мебаранд

ДУШАНБЕ, 15.07.2024 /АМИТ «Ховар»/. Дар шаҳри Душанбе ба муносибати 30-солагии фаъолияти FLEX (Барномаи табодул барои мактаббачагон) бо ташаббуси Шурои амрикоӣ ва дастгирии сафорати Иёлоти Муттаҳидаи Амрико дар Ҷумҳурии Тоҷикистон ҳамоиши тантанавӣ баргузор гардид.

Барномаи FLEX имконият фароҳам меорад, ки мактаббачагони болаёқат ва илмдӯсти тоҷик давоми як соли хониш дар оилаи амрикоӣ зиндагӣ ва дар мактаби миёнаи амрикоӣ таҳсил кунанд.

Давоми 30 соли амалӣ гардидани барномаи мазкур беш аз 30 ҳазор хонандаи мактабҳои миёна аз тамоми мамлакатҳои ҷаҳон ба Амрико сафар карда, дар оилаи муқаррарии амрикоӣ зиндагӣ ва дар мактаби миёна таҳсил карданд.

Аз Ҷумҳурии Тоҷикистон шурӯъ аз соли 1994 то ин ҷониб дар доираи барномаи FLEX беш аз 1 ҳазор хонандаи мактабҳои миёна ба забономӯзӣ фаро гирифта шуданд.

Бояд гуфт, ки интихоби хонандагон ба Барномаи FLEX ҳар сол аз моҳи август оғоз шуда, дар се давр гузаронида мешавад. Дар даври аввал хонандагон (танҳо хонандагони синфи 11) ба тариқи онлайн имтиҳон месупоранд. Онҳо се иншои кӯтоҳ бояд нависанд ва ба саволҳои тестӣ ҷавоб гӯянд. Дар даври дуюм хонадагон ба мусоҳиба даъват мешаванд. Дар даври сеюм довталабон саволномаро пур мекунад ва натиҷаи имтиҳонотро моҳҳои апрел-май интизор мешаванд.

Ҳамасола то 2,5 ҳазор хонандаи мактабҳои Тоҷикистон барои ворид шудан ба Барномаи FLEX кӯшиш мекунанд. Аз ин шумора 30-35 нафар интихоб шуда, барои таҳсил ва истиқомат ба Амрико фиристода мешаванд. Тамоми хароҷоти сафар ва таҳсилу истиқомат бепул мебошад.

Сардори Раёсати муносибатҳои байналмилалии Вазорати маориф ва илми Ҷумҳурии Тоҷикистон Амонулло Каримов зимни суҳбат бо АМИТ «Ховар» чунин изҳор кард: «Барномаи FLEX имкон фароҳам меорад, ки хонандагон барои омӯзиши беҳтари забони англисӣ ба Амрико рафта давоми як сол на танҳо қобилияти забондонии худро баланд бардоранд, ҳамчунин адабиёт, фарҳанг, таърих ва дигар унсурҳои забони англисиро аз худ мекунанд. Баҳри татбиқи самараноки «Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон барои давраи то соли 2030», ки тибқи қарори Ҳукумати Ҷумҳурии Тоҷикистон аз 30 августи соли 2019 қабул гардидааст, барномаи FLEX низ метавонад саҳми зарурӣ гузорад. Зеро ҷавонони мо тавонистанд дар доираи ин барнома маҳорати забондонии худро сайқал диҳанд».

Сафири Иёлоти Муттаҳидаи Амрико дар Тоҷикистон Мануэл Микаллер зимни суҳбат ба АМИТ «Ховар» изҳор кард, ки Барномаи FLEX яке аз нахустин барномаҳои Ҳукумати Иёлоти Муттаҳидаи Амрико дар Ҷумҳурии Тоҷикистон мебошад, ки аз соли 1994 то ин ҷониб бомуваффақият амалӣ шуда истодааст.

«Боиси хушнудист, ки Президенти Ҷумҳурии Тоҷикистон муҳтарам Эмомалӣ Раҳмон ҳамвора ҷавононро ба омӯзиши забонҳои хориҷӣ, аз ҷумла забони англисӣ даъват мекунанд. Бо назардошти ҳамин дар 8 шаҳру ноҳияи мамлакат гӯшаҳои амрикоӣ таъсис дода шуданд, ки ҳадаф аз онҳо ҳарчӣ бештар фаро гирифтани хонандагону ҷавонон ва қишрҳои гуногуни ҷомеа ба омӯзиши забони англисӣ мебошад. Дар ин маврид мехоҳам гӯям, ки Шурои амрикоӣ оид ба маорифи байналмилалӣ дар Ҷумҳурии Тоҷикистон дар ҳамкорӣ бо Вазорати маориф ва илми Тоҷикистон аз Барномаи FLEX самаранок истифода мебаранд. Дар доираи ин барнома мардумони Тоҷикистон ва Амрико ба ҳамдигар аз наздик шинос мешаванд, аз арзишҳои ҳамдигар огоҳ шуда ба фарҳангу таърих ва забону адабиёти ҳамдигар арҷ мегузоранд. Боиси хушнудист, ки хатмкунандагони барномаи мазкур имрӯз дар Тоҷикистон дар бахшҳои гуногун муваффақона кор мекунанд»,- гуфт сафир Мануэл Микаллер.

Дар Тоҷикистон беш аз 7 ҳазор нафар хатмкунандаи барномаҳои гуногуни омӯзишии табодулӣ дар доираи USANT бо ҳам омаданд, ки зимни татбиқи лоиҳаҳои якҷояи иҷтимоиву иқтисодӣ табодули таҷриба ва донишу маҳорат мекунанд.

Акрам САНГЗОДА,
Тоҳирҷон Саид (АКС),
АМИТ «Ховар»