Имрӯз дастаҳои мунтахаби футзали Тоҷикистон ва Узбекистон бозӣ мекунанд

ДУШАНБЕ, 18.07.2024 /АМИТ «Ховар»/. Дастаи мунтахаби футзали Тоҷикистон ҷамъомади таълимии худро дар шаҳри Гулистони вилояти Суғд анҷом дода, барои иштирок дар Мусобиқаи байналмилалӣ ба хотираи собиқ президенти Ассотсиатсияи футболи Узбекистон Мираброр Усмонов ба шаҳри Тошканд сафар кард. Дар ин хусус шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон хабар медиҳад.

Сармураббии дастаи мунтахаби Тоҷикистон Пайрав Воҳидов бо 15 нафар – 4 дарвозабон ва 11 бозингари майдон ба шаҳри Тошканд рафт.

Дастаи мунтахаби Тоҷикистон бозии ифтитоҳии худро дар Мусобиқаи байналмилалӣ ба хотираи собиқ президенти Ассотсиатсияи футболи Узбекистон Мираброр Усмонов имрӯз, 19 июл муқобили дастаи мунтахаби Узбекистон анҷом медиҳад. Вохӯрӣ дар Маҷмааи варзишии «Юнусобод» баргузор шуда, соати 19:30 оғоз мешавад.

Бояд гуфт, ки дастаи мунтахаби футзали Тоҷикистон дар шаҳри Тошканди Ҷумҳурии Узбекистон инчунин бо дастаҳои мунтахаби Гватемала (20 июл) ва Қирғизистон (22 июл) бозӣ мекунад.

АКС: Федератсияи футболи Тоҷикистон