БАЛАНДИИ ХОКБОРИШ ДАР ДУШАНБЕ ТО 6 КИЛОМЕТР САБТ ШУД. Дар Тоҷикистон чангу ғубор то 20 август боқӣ мемонад

ДУШАНБЕ, 19.08.2024 /АМИТ «Ховар»/. Дар Тоҷикистон ҳавои чангу ғуборолуд то 20 август боқӣ мемонад. Дар ин хусус АМИТ «Ховар» бо истинод ба Академияи миллии илмҳои Тоҷикистон хабар медиҳад.

Мувофиқи маълумоти лабораторияи физикаи атмосфераи Институти физикаю техникаи ба номи С.У. Умарови Академияи миллии илмҳои Тоҷикистон, ки тавассути асбобу таҷҳизоти муосири таҳқиқи атмосфераи Замин: «Lidar-PollyNet», фотометри офтобӣ ва спектрометри рентгенофлуорестсенсӣ СПЕКТРОСКАН — МАКС-G ба даст оварда шудааст, хокбориш ба фазои Душанбе 16 августи имсол, соати 09:00 ворид гардид.

Таҳқиқот аз рӯйи таҳлили масири баръаксии чангу ғубор нишон дод, ки 16 август саршавии масири чанг аз сели ҳавое, ки 7 шабонарӯз дар баландии 500 метр аз Британияи Кабир, 1000 метр аз Олмон ва 1500 метр аз Русия оғоз ёфта, ба биёбонҳои Осиёи Марказӣ- Аралқум, Қизилқум ва Қароқум ворид шуд, қисман аз ғарб ва қисми зиёд аз ҷануби Тоҷикистон (Шаҳритус) ба ҷумҳурии мо ворид гардидааст.

Баландии хокбориш дар шаҳри Душанбе то 6 километр сабт  шуд.

Таҳлили таркиби хокбориши воридгардида нишон медиҳад, ки дар он аз се унсури вазнини ба саломатии инсон зараровар: марги муш (арсеник), маранес ва оҳан бо консентратсияи каме зиёдтар аз миёнаи солҳои 2007-2022 муайяншуда дарёфт гардид.

7 унсури дигар, ба монанди мис, руҳ, хром ва ғайра дар таркиби хокбориш бо консентратсияи камтар мавҷуд ҳастанд ва бинобар ин ба саломатии инсон зарари зиёд намерасонанд. Дар таркиби аэрозоли хокбориш кобалт ва ванадий пайдо нашуд. Дар рӯзҳои хокбориш олудагии ҳаво дар фазои ҷумҳурӣ қариб 4 маротиба зиёд шудааст.

Хокбориш то 20 август идома меёбад. Бинобар ин, дар ин рӯзҳо ба одамоне, ки ба бемориҳои дил, роҳи нафас, баландфишорӣ ва монанди инҳо гирифторанд, тавсия дода мешавад, ки дар хонаҳо қарор гирифта, ҳангоми сайру гашт дар фазои кушод аз ниқобҳои муҳофизатӣ истифода кунанд.

АКС аз бойгонӣ