БОЗИҲОИ ОЛИМПИИ ПАРИЖ-2024. Имрӯз муштзани тоҷик Давлат Болтаев дар даври нимниҳоӣ рақобат менамояд
ДУШАНБЕ, 04.08.2024 /АМИТ «Ховар»/. Имрӯз, соати 20:30 ба вақти Душанбе, муштзани тоҷик Давлат Болтаев дар вазни то 92 кг дар даври нимниҳоии Бозиҳои тобистонаи олимпии Париж-2024 дар риштаи бокс рақобат менамояд, хабар медиҳад АМИТ «Ховар».
Дар ин давр рақиби Давлат Болтаев варзишгари узбекистонӣ Лазизбек Муллоҷонов мебошад.
Бояд тазаккур дод, ки муштзани тоҷик дар даври чорякниҳоӣ бар варзишгари ирландӣ Ҷек Марли бо ҳисоби 4:1 ғалаба намуд ва ба даври нимниҳоии Бозиҳои олимпӣ роҳ ёфт.
Ёдовар мешавем, муштзаноне, ки ба марҳилаи нимниҳоии Бозиҳои олимпии Париж-2024 баромаданд, аллакай ҷоизадори ин мусобиқа мебошанд.
Дастаи олимпии Ҷумҳурии Тоҷикистон дар Бозиҳои олимпии Париж-2024 ҳоло ду медали биринҷӣ дорад. Медалҳои биринҷиро аз риштаи ҷудо Сомон Маҳмадбеков дар вазни то 81 кг ва Темур Раҳимов дар вазни + 100 кг ба даст оварданд.
АКС аз манбаъҳои боз