«ДӮСТИРО ҶУСТУҶӮ ДОРЕМ МО…». Форуми дӯстии ҷавонони шаҳрҳои Душанбе ва Хоруғ баргузор гардид

ДУШАНБЕ, 20.08.2024. /АМИТ «Ховар»/. Дар шаҳри Хоруғ таҳти унвони «Дӯстиро ҷустуҷӯ дорем мо…» Форуми дӯстии ҷавонони шаҳрҳои Душанбе ва Хоруғ баргузор гардид. Дар ин хусус ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Дар фестивал иброз гардид, ки имрӯз Тоҷикистони соҳибистиқлол дар фазои орому осоишта ва сулҳу ваҳдат ба сӯи ояндаи дурахшон қадамҳои устувор гузошта, мардуми шарифи он бо шукргузорӣ аз ин неъмати бебаҳо ба меҳнати фидокорона ва созандагиву бунёдкорӣ машғул мебошанд.

Ташаббусҳои созандаи ҷавонон аз ҷониби Ҳукумати мамлакат ҳамеша дастгирӣ ёфта, ҷавонон дар корҳои роҳбарӣ дар шохаҳои ҳокимият, истеҳсолоту тиҷорат ва илму маърифат пурсамар фаъолият доранд.

Баргузории фестивал имкон дод, ки ҷавонони гуногункасб дар як муҳит ҷамъ омада, аз бурду бохт ва дастовардҳояшон ба ҳамсолон ва ҳамкасбон ибрози андеша намоянд. Ин майдон шароити мусоиди табодули маълумот, таҷрибаомӯзӣ, шиносоӣ, фароғат ва таҳкими дӯстиро барои ҷавонони ин минтақаҳо фароҳам меорад.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон