Дар даъвати тирамоҳӣ дар шаҳри Ваҳдат 260 ҷавон ба таври ихтиёрӣ ба сафи Артиши миллӣ ҳамроҳ мешавад

ВАҲДАТ, 10.08.2024 /АМИТ «Ховар»/. Дар асоси нақшаи чорабиниҳои Мақомоти иҷроияи ҳокимияти давлатии шаҳри Ваҳдат баҳри ҷалби ҷавонон ба сафи Артиши миллӣ дар ҷамоатҳои шаҳраку деҳот гурӯҳҳои корӣ зимни вохӯрӣ бо ҷавонони синни даъватӣ ва волидайни онҳо ҷавононро ба хизмати Ватан-Модар даъват намуда, онҳоро руҳбаланд мегардонанд. Хушбахтона, ҳоло маърифати ҳуқуқии ҷавонону сокинони шаҳр баланд гардидааст. То имрӯз барои ҳифзи Ватан зиёда аз 260 ҷавон ба таври ихтиёрӣ изҳори омодагӣ намудаанд, ки дар рӯзи аввали даъвати тирамоҳӣ ба сафи Артиши миллӣ мепайванданд. Ин матлабро зимни нишасти матбуотӣ Раиси шаҳри Ваҳдат Мирзо Исмоилзода иброз намуд.

Илова гардид, ки қисми зиёди ҷавонони синни даъватӣ аз ҳисоби Вазорати мудофиаи Тоҷикистон ва Мақомоти иҷроияи ҳокимияти давлатии шаҳри Ваҳдат ҳоло ба давраи омӯзишии ронандагӣ фаро гирифта шуда, дар даъвати ҳарбии тирамоҳӣ дар сафи Артиши миллӣ ҳамчун мутахассис-ронандаи мошинҳои гаронвазн хизмат менамоянд.

Мирзо Исмоилзода зимни нишасти матбуотӣ иброз намуд, ки бахшида ба Солҳои рушди саноат (2022-2026) баҳри саноатикунонии шаҳри Ваҳдат дар шаш моҳи соли 2024 аз ҳисоби соҳибкорон 4 коргоҳи нави саноатӣ ба кор дароварда шуд. Дар ин давра 20 корхонаи саноатии шаҳри Ваҳдат истеҳсоли маҳсулотро зиёд намуд. Ҳаҷми истеҳсоли маҳсулоти саноатӣ дар корхонаҳои расман сабтшуда дар шашмоҳаи аввали имсол 590 миллиону 619 ҳазор сомониро ташкил дод, ки нисбат ба ҳамин давраи соли 2023-юм 94 миллиону 53 ҳазор сомонӣ зиёд мебошад.

Ҳамзамон иттилоъ дода шуд, ки дар шаҳри Ваҳдат бахшида ба ҷашни бузурги 35-солагии Истиқлоли давлатии Ҷумҳурии Тоҷикистон бунёд ва ба истифода додани 808 иншоот, аз қабили 92 корхонаю коргоҳи саноатӣ, 51 иншооти соҳаи тандурустӣ, 119 иншооти соҳаи маориф, 23 иншооти варзишӣ, 24 иншооти фарҳангӣ, 212 иншооти хизматрасонӣ, 106 бинои истиқоматӣ ва дигар иншооти мухталиф ба нақша гирифта шудааст.

То имрӯз 298 иншоот мавриди истифода қарор дода шуд, ки инҳо 14 коргоҳу корхонаи саноатӣ, 22 иншооти соҳаи тандурустӣ, 37 иншооти соҳаи маориф, 8 иншооти соҳаи варзишу фарҳанг, 92 иншооти соҳаи хизматрасонӣ, 5 адад пул, 11 бинои баландошёна ва 48 иншооти дигар мебошанд. Дар иншооти боқимонда корҳои лоиҳакашӣ ва сохтмонӣ идома доранд.

Субҳониддини МАҲМУД,
АМИТ «Ховар»

АКС: АМИТ «Ховар»