Дар муассисаҳои тандурустии Тоҷикистон хизматрасониҳо тариқи пардохтҳои ғайринақдӣ амалӣ мегарданд

ДУШАНБЕ, 07.08.2024 /АМИТ «Ховар»/. Соли 2024 дар муассисаҳои давлатии тандурустӣ ва ҳифзи иҷтимоии аҳолӣ 1591 воситаи пардохтҳои электронӣ, аз ҷумла 820  постерминал ва 771 QR- рамзҳо дар 463 муассиса пайваст гардид. Дар ин хусус 5 август зимни нишасти матбуотӣ дар Вазорати тандурустӣ ва ҳифзи иҷтимоии аҳолии мамлакат иттилоъ дода шуд.

Баҳри иҷрои Фармони Президенти Ҷумҳурии Тоҷикистон аз 22 июни соли 2023 «Дар бораи тадбирҳои вусъат додани ҳисоббаробаркуниҳои ғайринақдӣ» дар муассисаҳои давлатии тандурустӣ ва ҳифзи иҷтимоии аҳолӣ пардохти ғайринақдӣ ҷорӣ гардида истодааст, ки  хизматрасониҳо аз тарафи аҳолӣ дар ин самт давра ба давра муътадил мешавад. Ҳамчунин дар муассисаҳои хусусии тиббӣ 50 постерминал ва 711 QR- рамзҳо насб гардидаанд.

Иттилоъ дода шуд, ки рушди босуръати технология дар ҷаҳони молиявӣ зарурати истифодаи чунин намуди пардохтҳо, ба мисли пардохтҳои ғайринақдиро тақозо мекунад.

Бояд гуфт, ки гузариш ба пардохтҳои ғайринақдӣ ба сарфаи вақту пешгирии хароҷоти иловагии муштариён мусоидат намуда,  минбаъд пардохти хизматрасонии давлатӣ танҳо ба таври ғайринақдӣ амалӣ мешавад.

Гузариш ба низоми пардохтҳои ғайринақдӣ талаботи аҳолиро ба пули нақд коҳиш дода, интизориҳоро дар назди банкомату постерминалҳои хазинаҳои ташкилоти қарзии молиявӣ барои гирифтани пули нақд аз байн мебарад ва сабаби сарфаи вақту коҳишёбии хароҷоти иловагии мардум мегардад.

АКС аз манбаъҳои боз