Дар Тоҷикистон ҳарорати ҳавои аввали фасли тирамоҳ 1-2 дараҷа баланд пешгӯӣ мешавад

ДУШАНБЕ, 26.08.2024 /АМИТ «Ховар»/. Ҳавои моҳи аввали тирамоҳ — сентябр ба обу ҳавои моҳи сентябри соли 2000 монанд хоҳад шуд. Ҳарорати миёнаи моҳонаи ҳаво дар ҳудуди меъёр ва дар баъзе ноҳияҳо аз меъёри иқлимӣ 1-2 дараҷа баланд пешгӯӣ шуда, даҳаи дуюми моҳ ҳарорати ҳаво рӯ ба пастшавӣ меорад. Дар ин хусус ба  АМИТ «Ховар» дар Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ доданд.

Моҳи сентябр ҳаво дар водиҳо то 25 ва дар ноҳияҳои доманакӯҳӣ то 19 дараҷа гармиро ташкил медиҳад. Дар нимаи аввали моҳ  ҳаво дар водиҳо шабона то 18 ва рӯзона то 36 дараҷа, дар ноҳияҳои доманакӯҳӣ шабона то 17 ва рӯзона то 30 дараҷа гарм пешгӯӣ мешавад.

Нимаи дуюми моҳ дар вилояти Хатлон ва водиҳои ноҳияҳои тобеи ҷумҳурӣ пастшавии ҳарорати ҳаво дар назар дошта шуда, дар водиҳо аз 15 то 32 дараҷа ва дар ноҳияҳои доманакӯҳ шабона 12 ва рӯзона то 24 дараҷа гарм мешавад.  Миқдори моҳонаи бориш (борон асосан дар даҳрӯзаи сеюми моҳ пешгӯӣ мешавад) дар ҳудуди меъёри иқлимӣ, дар баъзе ноҳияҳо аз меъёри иқлимӣ кам пешгӯӣ мешавад.

Дар вилояти Суғд ҳарорати миёнаи моҳонаи ҳаво аз меъёри иқлимӣ 1 дараҷа баланд пешгӯӣ шуда, дар водиҳо то 23 дараҷа ва дар ноҳияҳои кӯҳӣ то 15 дараҷа гармиро ташкил медиҳад. Дар нимаи дуюми моҳ пастшавии ҳарорати ҳаво дар назар дошта шуда, дар водиҳо шабона то 14 дараҷа ва рӯзона то 29 дараҷа гарм мешавад. Дар ноҳияҳои кӯҳӣ шабона 0+5 ва  рӯзона то 20 дараҷа гарм, дар рӯзҳои алоҳида ҳарорати ҳаво паст шуда, то 15 дараҷа гарм мешавад. Миқдори моҳонаи бориш дар водиҳо аз меъёри иқлимӣ кам ва дар ноҳияҳои кӯҳӣ аз меъёри иқлимӣ зиёд пешгӯӣ мешавад.

Дар вилояти Мухтори Кӯҳистони Бадахшон ҳарорати ҳаво аз меъёри иқлимӣ 1 дараҷа баланд пешгӯӣ мешавад. Дар нимаи аввали моҳ ҳаво шабона то 15 дараҷа ва рӯзона то 32 дараҷа гарм пешгӯӣ мешавад. Нимаи дуюми моҳ пастшавии ҳарорати ҳаво дар назар дошта шуда, шабона то 8 ва рӯзона то 23 дараҷа гарм мешавад.

Моҳи сентябр дар шарқи Вилояти Мухтори Кӯҳистони Бадахшон ҳаво то 5+8 дараҷа гарм мешавад. Давоми моҳ тағйирёбии ҳарорати ҳаво дар назар дошта шуда, шабона аз 0+5 дараҷа гарм то 0-5 дараҷа хунук, рӯзона аз 16 то 11 дараҷа гарм пешгӯӣ мешавад. Миқдори моҳонаи бориш аз меъёри иқлимӣ зиёд пешгӯӣ мешавад. Рӯзҳои алоҳида дар баъзе минтақаҳо шиддатёбии вазиши шамол бо суръати то 12-17 метр дар як сония пешгӯӣ мешавад.

 АКС: Дидор Саъдуллоев