ИМРӮЗ-РӮЗИ ҶАҲОНИИ КУМАКИ БАШАРДӮСТОНА. Он ба ақидаҳои бунёдии инсондӯстӣ, беғаразӣ, бетарафӣ ва озодӣ асос ёфтааст
ДУШАНБЕ, 19.08.2024 /АМИТ «Ховар»/. 19 август Рӯзи ҷаҳонии кумаки башардӯстона аст. Ин рӯз бо қатъномаи Маҷмаи Умумии Созмони Милали Муттаҳид аз 11 декабри соли 2008 барои мусоидат ба баланд бардоштани сатҳи огоҳии ҷомеа дар бораи талошҳои кумакҳои башардӯстона дар саросари ҷаҳон ва аҳамияти ҳамкории байналмилалӣ дар расонидани онҳо эълон гардидааст. Рӯзи ҷаҳонии кумаки башардӯстона ҳамзамон ба гиромидошти хотираи қурбониён-кормандони Созмони Милали Муттаҳид дар Ироқ рабт дорад. 19 августи соли 2003 дар Бағдод ҳангоми амалиёти террористӣ таркиш рух дод, ки бар асари он 22 нафар, аз ҷумла Намояндаи махсуси Дабири кулли Созмони Милали Муттаҳид Серҷио Виейра де Меллу ҳалок шуданд. Инчунин Рӯзи ҷаҳонии кумакҳои башардӯстона ба онҳое иртибот дорад, ки зимни иҷрои вазифа ва супоридани кумакҳои башардӯстона ба миллионҳо одамон ҳалок шудаанд.
Ин рӯз ҳамчунин зарурати идомаи кумаки башардӯстона дар саросари ҷаҳон, хусусан дар нуқтаҳои даргири сайёра, кишварҳои фақир ва давлатҳое, ки аз ҳодисаҳои нохуши табиӣ зарар дидаанд ва аҳамияти ҳамкории байналмилалӣ барои расонидани онро таъкид мекунад.
Тибқи иттилои Созмони Милали Муттаҳид, дар Рӯзи ҷаҳонии кумакҳои башардӯстона Бунёди Серҷио Виейра де Меллу аз соли 2010 инҷониб ҳамасола ба номи ӯ ҷоиза тақдим мекунад. Бо ин ҷоиза шахсони алоҳида, созмонҳо ва ҷамъиятҳо барои саҳми бориз дар ҳалли осоиштаи муноқишаҳо мукофотонида мешаванд.
Кумаки башардӯстона ба ақидаҳои бунёдии инсондӯстӣ, беғаразӣ, бетарафӣ ва озодӣ асос ёфтааст. Ҳар сол Рӯзи кумаки башардӯстона ба мавзуи мушаххас бахшида шуда, шарикони тамоми созмонҳои башардӯстонаро муттаҳид мекунад, то барои зинда мондан, некӯаҳволӣ ва шаъну шарафи одамони аз буҳронҳо зарардида дар тамоми манотиқи дунё, инчунин бехатарӣ ва ҳифзи кормандони соҳаи башардӯстона талош намоянд.
Кормандони созмонҳои башардӯстона ба ҷуз аз наҷоту ҳифзи ҷони одамон ва расонидани маводи зарурӣ ҳадафи дигар надоранд. Онҳо паҳлу ба паҳлу истода, ба нафароне хизмат мекунанд, ки дар минтақаҳои даргир ё доғи сайёра ва дар минтақаҳои аз офатҳои табиӣ зарардида қарор доранд. Новобаста аз хатар ё мушкилиҳо кормандони кумакҳои башардӯстона ба минтақаҳои офатзада ва хати пеши муноқишаҳо барои наҷот ва ҳифзи одамони ниёзманд сафар мекунанд. Рисолати кормандони соҳаи башардӯстона наҷот ва ҳифзи ҳаёти одамонро фаро мегирад.
Марзия САИДЗОДА,
АМИТ «Ховар»
АКС аз манбаъҳои боз
Тоҷикистон ба ҳайати Комиссияи панаврупоии Созмони ҷаҳонии тандурустӣ оид ба масъалаҳои иқлим ва тандурустӣ дохил шуд
Оилаи Саидвалӣ Тоиров аз ноҳияи Фирдавсии шаҳри Душанбе соҳиби Шоҳҷоизаи озмуни «Оилаи беҳтарин» гардид
Нақши осорхонаҳои таърихӣ дар тарбияи ватандӯстии насли наврас чӣ гуна аст?
15 МАЙ-РӮЗИ БАЙНАЛМИЛАЛИИ ИҚЛИМ. Ҳифзи иқлими сайёра ҳамкории дастҷамъонаи давлатҳоро тақозо менамояд
«ОИЛА-МАКОНИ МЕҲРУ САДОҚАТ». Таҳти чунин унвон ҳамоиш доир шуд
ИМРӮЗ — РӮЗИ БАЙНАЛМИЛАЛИИ ОИЛА. Бунёди ҷомеаи солим ва тарбияи насли ояндасоз яке аз масъалаҳои муҳими оила аст
Дар Душанбе Озмуни ҷумҳуриявии «Оилаи беҳтарин» ҷамъбаст карда мешавад
ОГОҲӢ. Дар Тоҷикистон то 17 май ҳарорати ҳаво баланд мешавад
Оила — ҷоест, ки дар он ҳама аъзои хонавода эҳсоси оромиш, амният ва ишқ намоянд. Эҳдо ба Рӯзи байналмилалии оила
КОНФРОНСИ БАЙНАЛМИЛАЛИИ САТҲИ БАЛАНД ОИД БА ҲИФЗИ ПИРЯХҲО. Дар Душанбе Форуми «Занон дар ҳифзи пиряхҳо» баргузор мегардад
Дар Шанхай вохӯрии роҳбарони сохторҳои минтақавӣ оид ба ҳолатҳои фавқулодаи минтақаҳои наздимарзии давлатҳои аъзои СҲШ доир гардид
Даври ҷумҳуриявии Фестивал-озмуни «Беҳтарин армуғон» ҷамъбаст гардид
