Варзишгарони тоҷик дар Чемпионати 4-уми Осиё оид ба каратэ-до ITKF соҳиби 29 медал шуданд

ДУШАНБЕ, 27.08.2024. /АМИТ «Ховар»/. Варзишгарони тоҷик дар Чемпионати 4-уми Осиё оид ба каратэ-до ITKF, ки дар шаҳри Самарқанди Ҷумҳурии Узбекистон баргузор гардид, сазовори 7 медали тилло, 10 медали нуқра ва 12 медали биринҷӣ гардиданд. Дар ин хусус ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Чемпионат аз 18 то 20 август дар шаҳри Самарқанди Ҷумҳурии Узбекистон байни наврасон, ҷавонон ва калонсолон баргузор гардид.

Дар чемпионат 24 варзишгар ва мураббии вилояти Суғд аз намуди каратэ иштирок намуда, дар байни варзишгарони 10 давлати ҷаҳон соҳиби 29 медал гардиданд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон