Дар шаҳри Левакант дар шароити хона занбурӯғ парвариш карда мешавад

Сентябрь 17, 2024 16:52

ДУШАНБЕ, 17.09.2024 /АМИТ «Ховар»/. Сокини деҳоти Ваҳдати шаҳри Левакант Зубайдулло Ҳамроев ба парвариши занбурӯғ машғул буда, бо фаро расидани фасли сармо парвариши онро дар гармхона оғоз мекунад. Дар ин хусус ба АМИТ «Ховар» дар Раёсати кишоварзии шаҳри Левакант иттилоъ доданд.

Бояд гуфт, ки талаботи сокинон ба занбурӯғ дар ҷумҳурӣ зиёд ва арзишаш хеле гарон мебошад. Аз ин рӯ, парвариши он дар шароити хона сол то сол рушд меёбад.

Ба иттилои манбаъ, таъму маззаи занбурӯғе, ки дар гармхона парвариш карда мешавад, аз занбурӯғи табиӣ фарқ надорад. Парвариши он дар шароити хона мушкил нест ва барои гирифтани ҳосили хуб  қоидаҳои агротехникии  парвариши он бояд риоя шавад.

Тавре Зубайдулло Ҳамроев мегӯяд, «дар хона аввал дар халтаҳои махсус тухми занбурӯғро мепошем. Ба мо майдаи тахта ё миқдоре коҳ ва пунбадонаи майдашудаю оҳаки обнарасида зарур мешавад. Ҳамаро якҷоя  омехта намуда, сипас онро дар об тар мекунем. Занбӯруғро дар ҳарорати на камтар аз 20 дараҷа гармӣ нигоҳ доштан зарур меояд».

Дар таркиби ин навъи занбӯруғ қариб 20 намуд моддаву витаминҳо ҷой доранд, ки истеъмоли он ба саломатии инсон бисёр муфид аст.

Занбурӯғ таъму бӯи хуш ва моддаҳои серғизо- витаминҳои А, В, Д, РР, С дошта, аз ин рӯ он чун маҳсулоти хӯрокворӣ маъмул гаштааст. Инчунин он дар таркиби худ пайвастҳои фосфор, сулфур, калий, хлор, руҳ, мис, хром, оҳан ва дигар микроэлементҳо дошта, аз 2,8 то 5 фоиз сафедаҳои зудҳазм дорад. Маҳз барои ҳамин онро «гӯшти ҷангалӣ» ё «гӯшти растанӣ» меноманд.

Моддаҳои равғани липоидҳо ва фосфоридҳои таркиби он зудҳазм мебошанд. Қанди таркиби занбурӯғ (глюкоза) онро серғизо ва ширин мекунад. Ба инсон таомҳои занбурӯғӣ фоидаи калон доранд. Аммо шахсоне, ки ба касалии ҷигар ва меъдаю рӯда гирифторанд, бояд аз истеъмоли таомҳои занбурӯғӣ худдорӣ кунанд.

Дар асари Абуалӣ ибни Сино «Ал-Қонун» дар бораи замбурӯғ  ҳамчун ғизо ва воситаи табобат маълумоти зиёди муҳим оварда шудааст.

 АКС аз манбаъҳои боз

Сентябрь 17, 2024 16:52

Хабарҳои дигари ин бахш

Рӯзи Президенти Тоҷикистон яке аз санаҳои муҳими тақвими сиёсию фарҳангии ҷумҳурӣ ба шумор меравад
Дар Фурудгоҳи байналмилалии Душанбе ба дастовардҳои даврони соҳибистиқлолии Тоҷикистон арҷ мегузоранд
АЗ СОЛИ БАЙНАЛМИЛАЛИИ ОБИ ТОЗА ТО РӮЗИ БАЙНАЛМИЛАЛИИ ЗЕҲНИ СУНЪИИ БЕХАТАР, ҲИФЗШУДА ВА БОЭЪТИМОД. Андешаҳо дар ин маврид
Зеҳни сунъӣ ба яке аз технологияҳои серталабтарини асри рақамӣ аз лиҳози истеъмоли неруи барқ табдил меёбад
Аз ноҳияи Ҷалолиддини Балхӣ ба Қазоқистону Русия лимӯ содирот карда мешавад
Дар Тоҷикистон нахустин маротиба Форуми байналмилалии саноати ангишт доир мегардад
Дар Шаҳринав нақшаи ҷамъоварии пахта 187,4 фоиз иҷро шуд
Дар ноҳияи Ҷалолиддини Балхӣ кишти тиромоҳӣ идома дорад
Дар Тоҷикистон Барномаи савдои электронӣ ба бахши муҳими иқтисодиёт табдил ёфтааст
«Муждаи зафар». Дар ноҳияи Ёвон дурнамои истеҳсоли пахта барзиёд иҷро гардид
Дар даврони соҳибистиқлолии Тоҷикистон ба соҳаи энергетика 30 миллиард сомонӣ равона гардид
АЗ ДАРТМУТ ТО ДУШАНБЕ. Зеҳни сунъӣ нисбат ба қоидаҳое, ки истифодаи онро танзим менамоянд, ба маротиб тезтар рушд мекунад