Имрӯз дар Душанбе лоиҳаи «Баланд бардоштани устувории кишоварзӣ» баррасӣ гардид

ДУШАНБЕ, 03.09.2024 /АМИТ «Ховар»/. Имрӯз дар шаҳри Душанбе ҷаласаи Кумитаи роҳбарикунандаи лоиҳаи «Баланд бардоштани устувории кишоварзӣ» баргузор гардид. Дар ин хусус АМИТ «Ховар» бо истинод ба Муассисаи давлатии «Рушди соҳибкорӣ дар соҳаи кишоварзӣ» иттилоъ медиҳад.

Муовини Сарвазири Ҷумҳурии Тоҷикистон Сулаймон Зиёзода иброз намуд, ки  Президенти Ҷумҳурии Тоҷикистон муҳтарам Эмомалӣ Раҳмон дар вохӯрӣ бо аҳли ҷомеаи мамлакат пайваста вазифагузорӣ менамоянд, ки масъалаи истифодаи маблағҳои сармоягузорӣ бояд дар сатҳу сифати баланд ва ба нафъи аҳолии деҳот амалӣ карда шаванд. Ин аз як ҷониб имконият фароҳам меорад, ки инфрасохтори кишоварзии минтақаҳои ҷумҳурӣ рушд ёбад ва аз ҷониби дигар, барои фароҳам овардани ҷойи нави кор мусоидат намояд.

Вазири кишоварзии Ҷумҳурии Тоҷикистон Қурбон Ҳакимзода гуфт, ки солҳои охир бо назардошти таҳаввулоти имрӯзаи ҷаҳонӣ дар самти таъмини амнияти озуқаворӣ ва тағйирёбии иқлим аз ҷониби Ҳукумати Ҷумҳурии Тоҷикистон барои ҷалби бештари сармоя ба соҳаи иқтисодию иҷтимоии мамлакат, бахусус соҳаи кишоварзӣ диққати бештар равонамегардад. Ин моро водор месозад, ки барои ҷалби бештари сармоя бо шарикони рушд ҳамкориро дар сатҳи шоиста ба роҳ монем.

Ҳамчунин гуфта шуд, ки бо ҷалби сармоя дастрасӣ ба техникаҳои наву мошинолоти муосири кишоварзӣ, тухмиҳои босифати сертификатшудаи зироати кишоварзӣ ва таъмиру таҷҳизонидани биною озмоишгоҳҳои муассисаҳои илмию таълимӣ ба рушди соҳаи кишоварзӣ, махсусан дар самти тухмипарварӣ мусоидат намуда, дар таъмини амнияти озуқаворӣ қадамҳои устувор мегузорад.

Иттилоъ дода шуд, ки лоиҳаи «Баланд бардоштани устувории кишоварзӣ» давоми фаъолият барои дастгирии хоҷагиҳои тухмипарвар, хоҷагиҳои ниёзманд, муассисаҳои илмию таълимии кишоварзӣ, таҳкими қонунҳои марбут ба соҳа саҳми беназир мегузорад, ки ин барои истеҳсоли фаровони маҳсулоти кишоварзӣ, таъмини бозори истеъмолӣ ва бо ҷои кор таъмин гардидани аҳолии мамлакат мусоидат менамояд.

Лоиҳа барои расидан ба яке аз ҳадафҳои стратегии пешгирифтаи Ҳукумати мамлакат-таъмини амнияти озуқаворӣ заминаи мусоид фароҳам меорад.

АКС: Муассисаи давлатии «Рушди соҳибкорӣ дар соҳаи кишоварзӣ»