Лоиҳаи навсозии ҳифзи иҷтимоӣ ва ҳамгироии иқтисодӣ баррасӣ шуд

ДУШАНБЕ, 20.09.2024 /АМИТ «Ховар»/. 19 сентябр зимни мулоқоти Вазири меҳнат, муҳоҷират ва шуғли аҳолии Ҷумҳурии Тоҷикистон Гулнора Ҳасанзода бо намояндагони миссияи Бонки ҷаҳонӣ, ки дар Ҷумҳурии Тоҷикистон қарор доранд, татбиқи саривақтии «Лоиҳаи навсозии ҳифзи иҷтимоӣ ва ҳамгироии иқтисодӣ»-ро баррасӣ намуданд. Дар ин хусус АМИТ «Ховар» бо истинод ба Вазорати меҳнат, муҳоҷират ва шуғли аҳолӣ хабар медиҳад.

Дар ҷараёни вохӯрӣ тарафҳо доир ба масъалаҳои марбут ба татбиқи саривақтии «Лоиҳаи навсозии ҳифзи иҷтимоӣ ва ҳамгироии иқтисод», аз ҷумла таҳияи «Феҳристи шахсони бекор», «Феҳристи муҳоҷирони меҳнатӣ», «Махзани ҷойҳои кории холӣ», «Барномаи фарогирии иқтисодӣ» ва ҳарчи бештар ба шуғл ва касбомӯзонӣ фаро гирифтани муҳоҷирони меҳнатии баватанбаргашта табодули афкор намуданд.

Дар вохӯрӣ роҳбарони сохторҳои таркибии вазорат, аз ҷумла, Агентии меҳнат ва шуғли аҳолӣ, Хадамоти муҳоҷират, муассисаҳои давлатии «Пажуҳишгоҳи меҳнат, муҳоҷират ва шуғли аҳолӣ» ва «Маркази таълими калонсолони Тоҷикистон» иштирок намуданд.

АКС: Вазорати меҳнат, муҳоҷират ва шуғли аҳолии Ҷумҳурии Тоҷикистон