Президенти мамлакат Эмомалӣ Раҳмон дар ноҳияи Ашт корхонаҳои дӯзандагӣ, ҷӯроббофӣ ва коргоҳи пойафзолдӯзиро мавриди истифода қарор доданд

ДУШАНБЕ, 08.09.2024 /АМИТ «Ховар»/. 8 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар маҷмааи корхонаҳои истеҳсолии ширкати “Саноати Ашт” корхонаҳои дӯзандагию ҷӯроббофӣ ва коргоҳи пойафзолдӯзиро мавриди истифода қарор доданд.

Соҳибкорони ватанӣ ва мутахассисони ширкати “Саноати Ашт” дар деҳаи Гулшан корхонаҳои дӯзандагию ҷӯроббофӣ ва коргоҳи пойафзолдӯзиро таъсису бунёд намудаанд, ки ин се корхонаю коргоҳи истеҳсолӣ якҷоя бо корхонаи ресандагӣ замина ба маҷмааи саноатии рушдёбанда мебошад. Ин иқдом дар рушди саноат дар деҳот саҳми арзанда ба муносибати эълони солҳои 2022-2026 “Солҳои рушди саноат” арзёбӣ гардид.

Иттилоъ дода шуд, ки корхонаи дӯзандагӣ бо вориду васлу насби 33 дастгоҳи муосир таъсис ёфтааст.

Дар корхона барои 35 нафар занону духтарони маҳаллӣ ҷойҳои корӣ фароҳам оварда шудааст.

Дар корхона як қатор маҳсулоти дӯзандагӣ, чун либосҳои занона, мактабӣ, махсуси корӣ ва ҳамчунин либосҳои варзишӣ дӯхта мешаванд.

Президенти Ҷумҳурии Тоҷикистон муҳтарам Эмомалӣ Раҳмон зимни шиносоӣ аз корхонаи дӯзандагӣ бо коргарон суҳбат карда, ба масъулону мутахассисони корхона супориш доданд, ки ҳаҷми истеҳсоли маҳсулоти дӯзандагӣ зиёд ва аз ҳисоби даромаднокӣ маоши коргарон баланд бардошта шавад.

Занону духтарони корхона ба Пешвои миллат муҳтарам Эмомалӣ Раҳмон барои фароҳам овардани чунин шароит ва ғамхорӣ нисбати онҳо изҳори сипосу қаноатмандӣ намуданд.

Корхонаи ҷӯроббофӣ нахустин дар минтақа буда, бо вориду насби 100 адад дастгоҳ таъсис дода шудааст.

Кори дастгоҳҳо ба таври автоматӣ сурат гирифта, маҳсулнокии баланд доранд. Дар 100 дастгоҳ дар як шабонарӯз дар ду басти корӣ 20 ҳазор ҷуфт ҷӯроб истеҳсол мегардад.

Ҳаҷми истеҳсоли солонаи ҷӯроб дар корхонаи навтаъсиси Ҷамъияти дорои масъулияти маҳдуди “Саноати Ашт” беш аз 6 миллион ҷуфтро ташкил медиҳад.

Барои ҷӯроббофӣ чор навъи ришта дар чор ранг ҳамчун асос истифода шуда, гулҳои ҷӯробҳо аз шаш ранги ришта истеҳсол мегарданд.

Истеҳсоли ҷӯробҳо аз 5 марҳилаи технологӣ – ҷӯроббофӣ, нӯкчадӯзӣ, дарзмол, тамғагузорӣ ва бандубаст иборат мебошад.

Ҷӯробҳо мутобиқ ба стандарту сифат бо тамғаи молии “Саноати Ашт”, истеҳсоли Ҷумҳурии Тоҷикистон ба харидорон пешниҳод мегардад.

Дар истеҳсоли ҷӯробҳо дар як баст 50 нафар бо кори баландмузд таъмин гардидаанд ва коргарон аксар занону духтарони маҳаллӣ мебошанд.

Президенти кишвар муҳтарам Эмомалӣ Раҳмон зимни шиносоӣ бо корхонаи тозабунёд, суҳбат бо соҳибкорону мутахассисон ва коргарон дастур доданд, ки ба сифату стандарти маҳсулот диққати хоса дода, минбаъд ҳаҷми истеҳсолро зиёд намоянд. Зеро талабот ба ин маҳсулоти ватанӣ дар бозори дохилӣ зиёд буда, таъмини эҳтиёҷоти аҳолии кишвар бо маҳсулоти ватанӣ аз самтҳои афзалиятноки рушди соҳаи саноат дар кишвар маҳсуб меёбад.

Бо таъсису фаъолияти коргоҳи пойафзолдӯзӣ ширкати “Саноати Ашт” дар таъмини талаботи аҳолӣ бо пойафзоли истеҳсоли худӣ саҳмгузорӣ менамояд.

Коргоҳ бо вориду насби маҷмӯи дастгоҳҳои пойафзолдӯзӣ, чун дастгоҳҳои дӯзандагӣ, қолабгирӣ ва коркарди пойафзол, бурандагӣ ва суфтакунӣ фаъолият менамояд.

Бо кӯшиши соҳибкорону мутахассисони ширкат ба коргоҳ дастгоҳи сохти нави дизайну гулпартоӣ ба пойафзол ворид карда шудааст, ки муосир буда, дар ороиши пойафзолу иҷрои амалҳои истеҳсолӣ корҳоро пурмаҳсул, хушсифат ва мутобиқи мӯду дӯхти муосир ба таври автоматӣ анҷом медиҳад.

Ашёи хоми асосӣ ба пойафзол — чарми табиӣ ва дигар ашёи хом, чун ширеш, тагбанд, патак ва амсоли ин дар асоси шартномаҳои ҳамкорӣ аз корхонаҳои соҳавии ватанӣ ва хориҷӣ ворид карда мешаванд.

Мутахассисони коргоҳ дар асоси таҷрибаи корӣ ва аз худ кардани технологияи муосир номгӯ, навъу намуди пойафзолро дар мӯду дӯхтҳои гуногун истеҳсол менамоянд.

Тибқи нақшаи ширкати “Саноати Ашт” бо мақсади рушди саноат дар минтақа дар баробари таъсиси силсилаи корхонаҳои саноатӣ бо афзоиши ҳаҷми коркарди солонаи нахи пахта, ба иқтидори пурра расонидани фаъолияти минбаъда дар коркарди нахи пахта ҳаҷми истеҳсоли маҳсулоти нимтайёру ниҳоӣ меафзояд, шумораи ҷойҳои корӣ зиёд карда мешавад.

Корхонаю коргоҳҳои Ҷамъияти дорои масъулияти маҳдуди “Саноати Ашт” дар рушди саноат, дар таъсису афзун намудани ҷойҳои корӣ дар деҳот нақши муҳим доранд. Бо татбиқи лоиҳаҳо иҷрои нақшаҳои тиҷоратӣ-истеҳсолӣ дар маҷмааҳои истеҳсолии ширкат ҷойҳои корӣ ва даромаднокии аҳолӣ зиёд мегардад.

Сарвари давлат муҳтарам Эмомалӣ Раҳмон дар саҳни маҷмааи истеҳсолӣ аз намоишгоҳи маҳсулоти корхонаю коргоҳҳои Ҷамъияти дорои масъулияти маҳдуди “Саноати Ашт” ва корхонаҳои коркарду саноатии ноҳия дидан намуданд.

Дар намоишгоҳ маҳсулоти корхонаю коргоҳҳои навтаъсис-корхонаҳои ресандагӣ, дӯзандагӣ, ҷуроббофӣ ва пойафзол аз қабили риштаҳои навъҳои гуногун, маҳсулоти дӯзандагӣ, либосҳои мактабӣ, либосҳои махсуси корӣ, номгӯю мӯдҳои мухталифи пойафзол, ҳама намуди ҷӯробҳое, ки бо тамғаи молии “Саноати Ашт” истеҳсол карда мешаванд, муаррифӣ гардиданд.

Пешвои миллат муҳтарам Эмомалӣ Раҳмон зимни шиносоӣ бо маҳсулоти корхонаю коргоҳҳои ноҳияи Ашт таъкид доштанд, ки яке аз ҳадафҳои рушди саноати миллӣ афзун намудани ҳаҷму номгӯи маҳсулоти ватанӣ ва таъмини бозори дохилӣ бо маҳсулоти истеҳсоли худӣ мебошад.

Сифату стандарт ва таъмини рақобатпазирии маҳсулоти саноатӣ имкон медиҳад, ки пеш аз ҳама бозори дохилӣ бо маҳсулоти саноатии ивазкунандаи воридот таъмин карда шавад ва иқтидори содиротӣ баланд гардад.