Ба мутахассисони филиалҳои ташкилоти қарзии молиявии минтақаи Кӯлоб пешгирии амалҳои қаллобӣ фаҳмонида шуд

ДУШАНБЕ, 07.10.2024 /АМИТ «Ховар»/. Аз ҷониби Ассотсиатсияи бонкҳои Тоҷикистон ва шуъбаи минтақавии Бонки миллии Тоҷикистон барои роҳбарон ва мутахассисони филиалҳои ташкилоти қарзии молиявии ноҳияҳои минтақаи Кӯлоб, соҳибкорони маҳаллӣ ва донишҷӯёни Донишгоҳи давлатии Кӯлоб ба номи Абуабдуллоҳи Рӯдакӣ дар мавзуи «Роҳҳои пешгирии амалҳои қаллобӣ ва таъмини бехатарии истифодаи воситаҳои пардохтӣ» машварат баргузор шуд. Дар ин хусус ба АМИТ «Ховар» дар Ассотсиатсияи бонкҳо хабар доданд.

Амалҳои қаллобӣ, намудҳои қаллобӣ дар интернет, таъмини амнияти воситаҳои электронии пардохтӣ, намудҳои пардохтҳои ғайринақдӣ, хавфҳои эҳтимолии пардохтҳои ғайринақдӣ, афзалияти пардохтҳои ғайринақдӣ барои аҳолӣ, масъулияти истифодабарандагон барои бехатарии воситаҳои пардохт, омӯзиши кормандони ташкилоти қарзии молиявӣ оид ба усулҳои зидди қаллобӣ, аҳамияти қарорҳои қабулшуда барои рушди ҳисоббаробаркунии ғайринақдӣ дар  Тоҷикистон ва ғайра аз ҷумлаи масъалаҳое буданд, ки кормандони Бонки миллии Тоҷикистон оид ба онҳо ба таври содаю фаҳмо маълумот пешниҳод намуданд.

Таъкид гардид, ки кормандони ташкилоти қарзии молиявӣ барои пешгирӣ кардани амалҳои қаллобӣ бояд ҳатман омӯзонида шаванд, то дар лаҳзаҳои дучор омадан бо амалиёти шубҳанок чӣ кор карданро донанд ва онро самаранок анҷом диҳанд.

АКС: Ассотсиатсияи бонкҳои Тоҷикистон