Бонки миллии Тоҷикистон ба «Бонки сармоягузорӣ ва қарзии Тоҷикистон» иҷозатнома дод

ДУШАНБЕ, 24.10.2024 /АМИТ «Ховар»/. Бинобар иваз шудани номи Ҷамъияти саҳомии пӯшидаи «Аввалин бонки молиявии хурд» Бонки миллии Тоҷикистон ба Ҷамъияти саҳомии пӯшидаи «Бонки сармоягузорӣ ва қарзии Тоҷикистон» барои фаъолияти бонкӣ барои анҷом додани амалиёти бонкӣ бо пули миллӣ ва асъори хориҷӣ иҷозатнома дод.

Дар ин хусус АМИТ «Ховар» бо истинод ба Бонки миллии Тоҷикистон иттилоъ медиҳад.

Ин тасмим мутобиқи Қонуни Ҷумҳурии Тоҷикистон «Дар бораи Бонки миллии Тоҷикистон», «Дар бораи низоми иҷозатдиҳӣ» ва «Дар бораи фаъолияти бонкӣ» гирифта шудааст.

Дар ин замина ба департаменти назорати бонкӣ ва департаменти низоми пардохт супориш дода шуд, ки дар Феҳристи ташкилоти қарзӣ, Феҳристи ҳуҷҷатҳои дорои хусусияти иҷозатдиҳӣ ва Маълумотномаи «Рамзҳои мушаххаси бонкии ташкилоти қарзии молиявии Ҷумҳурии Тоҷикистон» сабтҳои дахлдор ворид намоянд.

АКС: Бонки миллии Тоҷикистон