Дар Душанбе машваратҳои сиёсӣ байни Тоҷикистон ва Туркия баргузор гардиданд

ДУШАНБЕ, 11.10.2024 /АМИТ «Ховар»/. 10 октябр даври навбатии машваратҳои сиёсӣ байни вазоратҳои корҳои хориҷии Ҷумҳурии Тоҷикистон ва Ҷумҳурии Туркия баргузор шуданд, хабар медиҳад АМИТ «Ховар» бо истинод ба Вазорати корҳои хориҷии Ҷумҳурии Тоҷикистон.

Зимни машваратҳои сиёсӣ атрофи масъалаҳои вобаста ба тамосҳои сиёсӣ, таҳкими пояи шартномавӣ-ҳуқуқӣ, ҳамкорӣ байни  вазоратҳои корҳои хориҷии ду мамлакат, татбиқи имконияти ҳамкории тиҷоративу иқтисодӣ ва сайёҳӣ, инчунин ҳамкорӣ дар доираи созмонҳои байналмилалӣ ва минтақавӣ табодули афкор доир шуд.

Инчунин ҷонибҳо доир ба вазъи кунунӣ ва тавсеаи муносибатҳои гуногунҷанба байни Тоҷикистон ва Туркия мубодилаи афкор карданд. Саҳми машваратҳои сиёсӣ дар густариши ҳамкории мутақобилан судманди ду давлат дар соҳаҳои мавриди эҳтимоми муштарак баланд арзёбӣ гардида, ҷонибҳо омодагиашонро ба таҳкими бештари муносибатҳои дуҷониба изҳор намуданд.

АКС: Вазорати корҳои хориҷии Ҷумҳурии Тоҷикистон