Дар Норак даври шаҳрии Фестивали вилоятии «Либоси миллӣ-осори тамаддуни ҷаҳонӣ» баргузор шуд

ДУШАНБЕ, 25.10.2024 /АМИТ «Ховар»/. 23 октябр дар Қасри фарҳанги шаҳри Норак даври шаҳрии Фестивали вилоятии «Либоси миллӣ-осори тамаддуни ҷаҳонӣ» баргузор гардид, хабар доданд ба АМИТ «Ховар» дар Мақомоти иҷроияи ҳокимияти давлатии шаҳри Норак.

Меҳмонони фестивал бо намоиши ҳунарҳои мардумии занони шаҳр шинос шуданд.

Иброз гардид, ки либоси миллӣ оинае аст, ки дар он фарҳанги миллии мо инъикос ёфтааст. Тавре Президенти Тоҷикистон таъкид менамоянд: «Моро зарур аст, ки ба зуҳуроти нангини бегонапарастӣ ҳарчи зудтар хотима бахшида, сару либосҳои миллии духтарону занонро бештар тарғиб намоем, пеши роҳи тақлиду таассуб ва зоҳирпарастиро гирем ва дар байни занону духтарон корҳои фаҳмондадиҳиро вусъат бахшем».

Миллати тоҷик миллати соҳибтоҷ аст, аз ин лиҳоз дар тамоми соҳаҳо мо бояд аз таърихи бостониву тамаддунсозамон, ҳунар ва арзишҳои волои фарҳанги миллӣ, ҳамзамон аз либосҳои миллӣ, матои атласу адрас ва зардӯзиву чакан, ки моро ба ҷаҳониён муаррифӣ менамояд, бохабар бошем. Мо бояд ба қадри фарҳанги волои тоҷиконаи худ бирасем ва иффату зебоии занонаамонро ҳамеша нигаҳбон бошем, занону ҷавондухтаронро дар руҳияи худшиносӣ, худогоҳӣ ва хештанпарастӣ тарбия намоем ва аз либоси миллии худ ифтихор дошта бошем.

Дар ҷамъомад ба як зумра фаъолзанону духтарони ҳунарманд Сипосномаи Мақомоти иҷроияи ҳокимияти давлатии шаҳри Норак ва туҳфаҳои хотирмон супорида шуданд.

Барномаи рангини ҳунарӣ бо шеъру таронаҳои ватандӯстона пешкаши ҳозирин гардид.

АКС:Мақомоти иҷрояи ҳокимияти давлатии шаҳри Норак