Дар Тоҷикистон дар 170 ҳазор гектар кишти тирамоҳӣ гузаронида мешавад

ДУШАНБЕ, 06.10.2024 /АМИТ «Ховар»/. Имсол тибқи нақша кишоварзони мамлакат дар 170 ҳазор гектар кишти тирамоҳӣ мегузаронанд. Дар ин хусус ба АМИТ «Ховар» дар Вазорати кишоварзии  Чумҳурии Тоҷикистон иттилоъ доданд.

Кишти тирамоҳӣ бо мақсади таъмини амнияти озуқавории мамлакат, танзими нарх дар бозорҳои истеъмолӣ ва афзун намудани иқтидори содиротии маҳсулоти кишоварзӣ гузаронида мешавад.

«Яке аз роҳҳои муфиди ба даст овардани ҳосили хуб дар вақти кишти тирамоҳӣ -гузаронидани корҳои шудгор, мола, нарм намудани замин ва ворид намудани нуриҳои маъданию органикӣ мебошад»,-чунин тавсия медиҳад доктори илмҳои кишоварзӣ  Ҳикматулло Назиров

Ҳикматулло Назиров мегӯяд, дар замине, ки кишти зироати тирамоҳӣ гузаронида мешавад, бояд донист, ки кишти пешина чӣ буд. Инро ба назар гирифта, баъд мо интихоб мекунем, ки кадом зироат баъди кишти ғалладона, юнучқа ё ҷуворимакка бояд бо интихоби навъҳои зироати кишоварзӣ ба роҳ монда шавад. Камҳосилӣ ва хуб нашъу намо наёфтани зироати кишоварзӣ дар бисёр ҳолатҳо- ин риоя нагардидани муҳлати кишти зироат ба ҳисоб меравад. Муҳлати кишти майдонҳое, ки барои кишти зироати кишоварзӣ омода шудааст, вобаста ба ҷойгиршавии минтақаҳо бояд ҳатман риоя шавад.

Дар давраи тирамоҳ кишоварзони мамлакат кишти картошкаро низ мегузаронанд. Кишти тирамоҳии картошка ба хотири ҳосили барвақтӣ гирифтан аз он гузаронида мешавад. Ин кор дар ноҳияҳои вилояти Хатлон аз нимаи дуюми моҳи ноябр то 10-15 моҳи декабр идома меёбад. Дар ноҳияҳои тобеи марказ ин маърака метавонад дар ҳамин вақт ва ё моҳи феврал гузаронида шавад. Ин амал дар ноҳияҳои кӯҳӣ ва наздикӯҳӣ тавсия дода намешавад.

Ба маълумоти Ҳикматулло Назиров, кишти барвақтии пиёз моҳҳои август-сентябр гузаронида шуда, кишти ояндаи он метавонад моҳи феврал ба анҷом расад. Мо метавонем, ки дигар зироати кишоварзӣ, масалан кишти карам, баъдтар кишти сабзиро низ ба роҳ монем ва барои баланд бардоштани ҳосилнокӣ ин кор хеле таъсири муфид мерасонад.

АКС: АМИТ «Ховар»