Маркази обуҳавошиносии шаҳри Хоруғ соҳиби бинои нави замонавӣ мегардад
ХОРУҒ, 01.10.2024 /АМИТ «Ховар»/. Маркази обуҳавошиносии шаҳри Хоруғ соҳиби бинои нави замонавӣ мегардад. Марказ, ки 40 сол қабл аз ин дар бинои кӯҳнаи сохти финӣ дар шаҳраки Сомониёни шаҳр мавқеъ дошт, бо гузашти айём садамавӣ шуда, фаъолият дар он барои кормандони марказ қариб номумкин гардид.
Сардори Маркази обуҳавошиносии шаҳри Хоруғ Кишвар Наврузшоев ба хабарнигори минтақавии АМИТ «Ховар» Файз Мирасан гуфт, ки «ин бино солҳои пеш аз чӯбу тахта бунёд ёфта буд ва бо мурури замон масолеҳи сохтмониаш пӯсида, фаъолият дар он барои кормандон хатарзо гардид. Имрӯзҳо корҳои бунёдӣ дар бинои нави марказ идома дошта, 10 бинокори маҳаллӣ аз Ҷамъияти саҳомии «Помирсохтмон» дар ин ҷо фаъолият мекунанд. Умед дорем, ки то охири соли равон бинои мазкур бо тамоми таҷҳизоти муосири обуҳавошиносӣ дар ихтиёри мо қарор мегирад».
Ҳоло дар ошёнаи якум хиштчинӣ ба анҷом расида, коргарон дар боми бино ба оҳанбандиву бетонрезӣ машғул мебошанд. Бинои нави Маркази обуҳавосанҷӣ бо дарозии 13 метр ва паҳноии 10 метр сохта мешавад. Аз рӯи лоиҳа дар он 4 утоқи корӣ ҷой дода шуда, барои фаъолияти пурсамари кормандони Маркази обуҳавошиносӣ шароити мусоид фароҳам оварда мешавад. Масолеҳи сохтмонӣ, аз қабили оҳану хишт аз пойтахти ҷумҳурӣ дастрас гардида, коргарони Корхонаи шакли кушоди «Бунёд» сари вақт сохтмонро бо бетон таъмин мекунанд. Музди меҳнати бинокорон аз рӯи ҳаҷми иҷрои кор сари вақт пардохт мешавад. Мутобиқи нақша, корҳои бунёдӣ дар бинои Маркази обуҳавошиносии вилоят моҳи декабр ба анҷом расида, боз як иморати замонавӣ маркази вилоятро оро медиҳад.
Соҳаи санҷиш ва пешгӯии обу ҳаво дар замони мо ва бахусус дар шароити манотиқи кӯҳистон, ки иқлим бо суръати баланд тағйир меёбад, хеле муҳим мебошад. Сари вақт кӯчонидани одамон дар ҳолатҳои офатҳои табиӣ, ба мисли фаромадани селу тарма ва афтидани сангрезаву кӯҳпораҳо маҳз ба маълумоти дақиқу дурусти ин марказ вобаста аст. Ҳамчунин бисёр соҳаҳои иқтисод, бахусус пешрафти соҳаи кишоварзӣ ва ба даст овардани ҳосили дилхоҳ аз пешгӯии обу ҳаво вобаста аст.
Баъди ба истифода супоридани ин марказ фаъолияти мутахассисон беҳтар мешавад.
АКС: АМИТ «Ховар»
Имрӯз дар водиҳои Тоҷикистон ҳаво то 38 дараҷа гарм мешавад
Бо мақсади пешгирии ҳодисаҳои ғарқшавӣ таҳти унвони «Наҷоти сайёр» дар Душанбе ва ноҳияҳои тобеи ҷумҳурӣ корҳои фаҳмондадиҳӣ оғоз шуд
ҲАВАСМАНДИИ ОМӮЗГОРОН. Давоми 18 сол 3394 нафар омӯзгорони ҷавон дар вилояти Хатлон соҳиби замин гардиданд
Доир ба ташаббусҳои Пешвои миллат дар шаҳри Хоруғ конфронси ҷумҳуриявӣ баргузор шуд
137 акси аксбардори маъруфи тоҷик Заур Дахте ба фонди Осорхонаи миллии Тоҷикистон супорида шуд
Дар ноҳияи Дарвоз оид ба истифодаи сарфакоронаи неруи барқ вохӯрӣ доир гардид
ТАҶРИБАИ НАВ ДАР ЗАФАРОБОД. Дар хоҷагии деҳқонии «Ҳоҷӣ Адҳамхон» 56 адад панели офтобӣ насб карда шудааст
Сокинони ноҳияи Файзобод дар заминҳои наздиҳавлигӣ бештар картошка парвариш менамоянд
ИСТИФОДАИ САМАРАНОКИ ЗАМИН. Сокинони деҳаи Навдеҳи шаҳри Норак таҷрибаи пешқадами кишоварзони ҷаҳонро меомӯзанд
Имрӯз ҳаво дар шаҳри Душанбе то 37 дараҷа гарм мешавад
Дар 86 муассисаи таҳсилоти миёнаи касбии Тоҷикистон аз рӯйи 344 номгӯйи ихтисос мутахассисон омода карда мешаванд
Хиёбони Рӯдакӣ 57: манбаи имкониятҳои рақамӣ дар маркази Душанбе
