ОБОДОНӢ ДАР МАҲАЛ. Роҳи деҳаи Чашмасори ноҳияи Ёвон мумфарш мегардад

ЁВОН, 25.10.2024 /АМИТ «Ховар»/. Дар деҳаи Чашмасори Ҷамоати деҳоти ба номи Ҳасан Ҳусейнови ноҳияи Ёвон мумфаршнамоии роҳи 11-километра оғоз гардид. Дар ин хусус ба хабарнигори АМИТ «Ховар» Субҳониддини Маҳмуд масъулини Мақомоти иҷроияи ҳокимияти давлатии ноҳияи Ёвон иттилоъ доданд.

Дар ҳашари умумии сокинон раиси ноҳия аз номи Мақомоти иҷроияи ҳокимияти давлатии ноҳияи Ёвон иқдоми сокинонро шоиста арзёбӣ намуда, иброз дошт, ки роҳсозӣ яке аз амалҳои хайру савоб ба шумор меравад. Аз ин рӯ ҳар сокини ноҳия бояд дар ободонии деҳа ва муҳайё намудани шароити мусоид барои фарзандону ояндагон саҳми арзанда гузорад.

Мумфаршнамоии ин роҳ бо дастгирии Мақомоти иҷроияи ҳокимияти давлатии ноҳияи Ёвон, саҳми аҳолӣ ва дастгирии ҷавонони ватандӯсти деҳа амалӣ гардид. Дар оғози ин иқдом фаъолони деҳаи Чашмасор бо сипосномаҳо сарфароз гардонида шуданд.

Дар пайравӣ ба сиёсати созанда ва бунёдкоронаи Пешвои миллат муҳтарам Эмомалӣ Раҳмон ва бо мақсади сазовор таҷлил намудани ҷашни 35-солагии Истиқлолияти давлатии Ҷумҳурии Тоҷикистон дар ҳамаи ҷамоатҳои шаҳраку деҳоти ноҳияи Ёвон ободкориҳо идома доранд.

АКС: Мақомоти иҷроияи ҳокимияти давлатии ноҳияи Ёвон