Тоҷикистон ба ҳамкорӣ бо Бонки аврупоии таҷдид ва рушд баҳои баланд медиҳад

Октябрь 1, 2024 18:03

ДУШАНБЕ, 01.10.2024 /АМИТ «Ховар»/. Имрӯз вохӯрии муовини якуми Сарвазири Ҷумҳурии Тоҷикистон Ҳоким Холиқзода бо  ноиби Президенти Бонки аврупоии таҷдид ва рушд Марк Боуман баргузор гардид, хабар медиҳад АМИТ «Ховар».

Зимни мулоқот иброз гардид, ки Тоҷикистон ба ҳамкорӣ бо Бонки аврупоии таҷдид ва рушд, бахусус саъю кӯшишҳои он барои дастгирии рушди иқтисодӣ ва рушди устувори мамлакат баҳои баланд медиҳад.

«Мо дар ин ҳамкорӣ дурнамои бузургро мебинем ва боварӣ дорем, ки лоиҳаҳои муштарак ҳам барои мамлакати мо ва ҳам барои минтақа натиҷаҳои дарозмуддат хоҳанд дод. Аз соли 1993 инҷониб дар ҳамкорӣ бо Бонки аврупоии таҷдид ва рушд (БАТР) лоиҳаҳои сармоягузорӣ ба маблағи қариб 1 миллиард евро барои мусоидат ба рушди бахшҳо, аз қабили обу корезӣ, нақлиёт, энергетика, тиҷорат ва бахши хусусӣ татбиқ шуданд, ки боз як далели аҳамияти ҳамкории мо мебошад»,-изҳор намуд Ҳоким Холиқзода.

Таъкид гардид, ки афзалияти кунунии Ҳукумати Тоҷикистон татбиқи лоиҳаҳои бузурги инфрасохториро фаро мегирад, ки метавонанд дар оянда омили рушди минбаъдаи иқтисодӣ гарданд.

Тоҷикистон бобати навсозии шабакаҳои нақлиётӣ, ки барои беҳтар намудани таъминоти логистика ва таҳкими робитаҳо бо кишварҳои ҳамсоя муҳим ҳастанд, фаъолона кор мебарад.

Зимни вохӯрӣ диққати махсус ба сохтмони роҳҳои нав, нақбҳо, инчунин рушди иқтидори энергетикӣ, хусусан гидроэнергетика равона гардид, ки он яке аз афзалияти стратегӣ ба шумор меравад.

«Дар ин замина мо омодаем ҳамкориро бо бонк ва лоиҳаҳои он барои рушди инфрасохтори шаҳрӣ, нав кардани иншооти энергетикӣ, ҳамчунин сохтмони обанборҳо ва системаҳои таъминкунӣ тақвият бахшем. Мо аҳамияти рушди устуворро дарк мекунем ва технологияҳои «сабз»-ро дар лоиҳаҳои худ фаъолона пешбарӣ мекунем. Рушди манбаъҳои барқароршавандаи энергия, бахусус энергияи офтобӣ ва обӣ аз самтҳои афзалиятноки Ҳукумати мо аст»,- изҳори назар намуд муовини якуми Сарвазири Ҷумҳурии Тоҷикистон Ҳоким Холиқзода.

АКС: АМИТ «Ховар»

 

Октябрь 1, 2024 18:03

Хабарҳои дигари ин бахш

Дар Душанбе ҷаласаи 18-уми Комиссияи байниҳукуматии Тоҷикистону Беларус доир шуд
Татбиқи лоиҳаҳои муштараки ҳукумати электронӣ ва таҳияи платформаҳои рақамӣ баррасӣ гардид
Ширкатҳои фаронсавӣ метавонанд дар рушди соҳаи сайёҳии Хатлон саҳм гузоранд
Намояндаи доимии Хазинаи байналмилалии асъор ба сиёсати зиддикоррупсионии Тоҷикистон баҳои мусбат дод
Дар Тоҷикистон 3 миллион сар гӯсфанди зоти ҳисорӣ парвариш меёбад
Вазири кишоварзии Тоҷикистон Раиси Шурои байниҳукуматӣ оид ба масъалаҳои комплекси агросаноатии ИДМ барои солҳои 2025-2026 интихоб гардид
Бунёди ҷаҳонии AIM барои татбиқи лоиҳаҳо дар самти энергияи барқароршавандаи Тоҷикистон изҳори омодагӣ намуд
Дар Тоҷикистон саршумори ҳайвоноти нодир афзоиш ёфтааст
Вазири сайёҳии Монтенегро бо пойгоҳи омодасозии кадрҳои соҳаи сайёҳии Донишгоҳи байналмилалии сайёҳӣ ва соҳибкории Тоҷикистон шинос шуд
Ҷаласаи 37-уми Шурои байниҳукуматӣ оид ба масъалаҳои комплекси агросаноатии ИДМ оғоз гардид
Дастовардҳои Тоҷикистон дар соҳаи инфрасохтори роҳу нақлиёт дар конфронси ҷаҳонии GICC муаррифӣ шуданд
Дар Қазоқистон Намоишгоҳи маҳсулоти кишоварзӣ, саноатӣ, ҳунарҳои мардумӣ ва таомҳои миллии Хатлон доир мегардад