Вобаста ба масъалаи ҳуқуқи занон дар оила ва ҷомеа ҳамоиш баргузор гардид

ДУШАНБЕ, 28.10.2024 /АМИТ «Ховар»/. Бахшида ба Соли маърифати ҳуқуқӣ ва 30-солагии қабули Конститутсияи Ҷумҳурии Тоҷикистон таҳти унвони «Ҳуқуқи занон дар оила ва ҷомеа» ҳамоиш баргузор гардид. Дар ин хусус АМИТ «Ховар» бо истинод ба Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе хабар медиҳад.

Иброз гардид, ки бо мақсади танзими муносибатҳои оилавӣ, ҳимояи ҳуқуқҳои модару кӯдак ва дигар масъалаҳои вобаста ба он то инҷониб дар мамлакат беш аз 60 санади меъёрӣ-ҳуқуқӣ қабул гардидааст, ки заминаи асосии он аз санади олии мамлакат-Конститутсия сарчашма мегирад.

Қонунҳои Ҷумҳурии Тоҷикистон «Дар бораи кафолатҳои давлатии баробарҳуқуқии мардону занон ва имконияти баробари амалигардонии онҳо», «Дар бораи пешгирии зӯроварӣ дар оила», «Дар бораи ҳифзи ҳуқуқҳои кӯдак», «Консепсияи рушди оила дар Ҷумҳурии Тоҷикистон», «Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021-2030», «Дар бораи Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занон ва духтарони лаёқатманд барои солҳои 2023-2030» ва «Барномаи давлатии рушди оила дар Ҷумҳурии Тоҷикистон барои солҳои 2024-2028» бозгӯи он мебошанд.

Иброз гардид, ки маърифати ҳуқуқии шаҳрвандон дар ташаккули ҷомеаи ҳуқуқбунёд ва масъулиятшинос нақши ҳалкунанда дорад.

Қабул гардидани Конститутсияи Тоҷикистон, ки дар роҳи бунёд ва рушди давлати навини тоҷикон нақши сарнавиштсоз дорад, яке аз дастовардҳои бузурги даврони соҳибистиқлолии мамлакат мебошад. Маҳз аз самараи неки Истиқлоли давлатӣ ва файзи ваҳдати миллӣ ба масъалаҳои баланд бардоштани мақоми зан дар ҷомеа, дастгирии онҳо ва фаъолияти кормандони касбу кори гуногун аз ҳисоби занон афзалияти хосса дода мешавад.

Конститутсияи давлати соҳибихтиёри тоҷикон ягона роҳи дуруст ва таҷассумкунандаи манфиатҳои миллӣ, таконбахши рушди бонизоми давлат ва таъминсозандаи зиндагии орому босуботи ҷомеа аст.

Бунёди ҷомеаи демократӣ, ҳуқуқбунёд ва иҷтимоӣ мақсад ва вазифаи асосии давлат буда, кафолати амалӣ гардидани онҳо дар Конститутсия муқаррар карда шудааст. Дар натиҷаи талошҳои Ҳукумати мамлакат, пуштибонии мардуми Тоҷикистон ва дар асоси ин меъёри конститутсионӣ дар як давраи нисбатан кӯтоҳи таърихӣ сохти конститутсионӣ барқарор гардид ва сулҳу оромӣ, ваҳдати миллӣ, амният ва тартиботи ҳуқуқиву ҷамъиятӣ таъмин карда шуд.

АКС: Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе