ЛИГАИ ОЛИИ ТОҶИКИСТОН. «Панҷшер» дар сафар дастаи футболи «Регар-ТадАЗ»-и шаҳри Турсунзодаро мағлуб намуд

ДУШАНБЕ, 28.11.2024 /АМИТ «Ховар»/. Бозии мавқуфмондаи даври 19-уми Лигаи олии Тоҷикистон байни дастаҳои футболи «Панҷшер»-и ноҳияи Ҷалолиддини Балхӣ ва «Регар-ТадАЗ»-и шаҳри Турсунзода доир гардид. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Вохӯрии дастаҳо дар варзишгоҳи «Талко-Арена»-и шаҳри Турсунзода баргузор гардида, бо ҳисоби 1 бар 0 ба фоидаи дастаи футболи «Панҷшер»-и ноҳияи Ҷалолиддини Балхӣ анҷом ёфт.

Бояд гуфт, ки ягона голи вохӯриро бозингари дастаи «Панҷшер»-и ноҳияи Ҷалолиддини Балхӣ Рамазон Эшматов дар дақиқаи 87-уми бозӣ ба нишон расонида, ғалабаи дастаашро таъмин кард. Ҳамчунин Рамазон Эшматов беҳтарин бозингари дидор эътироф гардид. Баъди ин пирӯзӣ дастаи футболи «Панҷшер»-и ноҳияи Ҷалолиддини Балхӣ шумораи имтиёзҳояшро ба 16 адад расонида, дар зинаи 11-уми ҷадвали мусобиқа боқӣ монд. Ин охирин бозии дастаи «Панҷшер»-и ноҳияи Ҷалолиддини Балхӣ дар мавсими имсолаи Лигаи олӣ буд. Дастаи футболи «Регар-ТадАЗ»-и шаҳри Турсунзода бо 32 имтиёз дар зинаи 7-ум аст.

Дастаи футболи «Истиқлол»-и шаҳри Душанбе бо 53 имтиёз пешгоми ҷадвали мусобиқа буда, пеш аз муҳлат аллакай унвони чемпиониро соҳиб шуд. Барои дастаи футболи «Истиқлол»-и шаҳри Душанбе ин сенздаҳумин медали тилло дар таърихи бошгоҳ аст. Қаблан дастаи «Истиқлол»-и шаҳри Душанбе солҳои 2010, 2011, 2014, 2015, 2016, 2017, 2018, 2019, 2020, 2021, 2022 ва 2023 чемпиони Тоҷикистон шуда буд.

АКС: Федератсияи футболи Тоҷикистон