Ташкилоти қарздиҳии «Рушди кӯҳистон» дар ноҳияи Рӯшон соҳиби бинои дуошёна гардид

ХОРУҒ, 04.11.2024 /АМИТ «Ховар»/. Дар остонаи Рӯзи қабули Конститутсияи Ҷумҳурии Тоҷикистон Ташкилоти қарздиҳии хурди «Рушди кӯҳистон» дар ноҳияи Рӯшон соҳиби бинои дуошёнаи Маркази хизматрасонӣ гардид. Ин сеюмин маркази хизматрасонӣ аст, ки Ташкилоти қарздиҳии «Рушди кӯҳистон» дар Бадахшон ифтитоҳ мекунад.

Тавре мухбири минтақавии АМИТ «Ховар» Файз Мирасан иттилоъ медиҳад, даҳаи охири моҳи октябр чунин марказҳои хизматрасонӣ дар ноҳияҳои Ванҷу Роштқалъа низ дари худро ба рӯи мизоҷон боз карданд.

Бинои нав мутобиқ ба талаботи меъёрҳои қабулнамудаи бонкӣ сохта шуда, бо тамоми технологияи муосир таъмин шудааст. Раиси Шурои нозирони Ташкилоти қарздиҳии хурди «Рушди кӯҳистон» Озодшо Одинамамадов гуфт, ки «имсол Ташкилоти қарздиҳии «Рушди кӯҳистон» дар ҳамкорӣ бо Оҷонсии амрикоӣ оид ба рушди байналмилалӣ ҳамчунин шаш маркази хизматрасонӣ дар деҳоти дурафтодаи ҷумҳурӣ, аз ҷумла ноҳияҳои Панҷ, Айнӣ ва Мастчоҳ ифтитоҳ менамояд. Хизматрасонии хубу дастрас ба ин ташкилоти молӣ имконият фароҳам овард, ки теъдоди мизоҷонро сол аз сол зиёд намояд».

Раиси Шурои нозирони Ташкилоти қарздиҳии «Рушди кӯҳистон» ҳангоми ифтитоҳи маркази нави хизматрасонӣ ҳамкоронро даъват намуд, ки барои баланд бардоштани савияи дониш ва омӯзиши ҳаматарафаи технологияи муосир талош намоянд.

Таъкид шуд, ки ба масъалаи мутобиқсозии низоми бонкдорӣ ба шароити муосир, таҳкими қурби пули миллӣ, беҳдошти сатҳи хизматрасонии бонкӣ, масъалаи амонатгузорӣ ва ҷобаҷогузори кадрҳо таваҷҷуҳ зоҳир гардад.

АКС: АМИТ «Ховар»