То моҳи ноябр дар вилояти Суғд зиёда аз 640 ҳазор тонна картошка истеҳсол гардидааст

ДУШАНБЕ, 20.11.2024. /АМИТ «Ховар»/. Дар вилояти Суғд то аввали моҳи ноябр зиёда аз 640 ҳазор тонна картошка истеҳсол гардидааст. Ин рақам нисбат ба ҳамин давраи соли гузашта 105 ҳазор тонна зиёд мебошад. Дар ин хусус 19 ноябр зимни баргузории Фестивали асал, картошка ва анор бо иштироки Президенти Ҷумҳурии Тоҷикистон муҳтарам Эмомалӣ Раҳмон иттилоъ дода шуд.

Сарвари давлат бо назардошти шароити кунунии иқлим ва зиёдшавии талабот ба маводи ғизоӣ дар бозори истеъмолии ҷаҳон дар шаҳру ноҳияҳои асосии картошкапарварии вилоят – Панҷакент, Истаравшан, Исфара, Кӯҳистони Мастчоҳ, Айнӣ, Шаҳристон ва Деваштич истифодаи пурраи имконияти табиӣ, омӯзиши технологияи муосир ва дар истеҳсолот ҳарчи бештар татбиқ кардани таҷрибаи муосири кишту парвариши ин намуди сабзавотро зарур донистанд.

Иттилоъ дода шуд, ки афзалият додан ба парвариши навъҳои тухмии ватанӣ, риояи талаботи агротехникӣ ва меҳнати пайваста имкон фароҳам овард, ки истеҳсоли картошка дар ин давра 313,9 ҳазор тонна зиёд гардад.

Бояд гуфт, ки дар Тоҷикистон соли 2020   1 миллион тонна картошка истеҳсол гардид. Ин рақам соли 2021 ба 1 миллиону 20 ҳазор тонна расид. Соли 2023 дар ҳама шаклҳои хоҷагидорӣ дар ҷумҳурӣ дар майдони 55 ҳазору 527 гектар картошка кишт шуд. То 1 ноябри соли 2023   989 ҳазору 782 тонна картошка ҷамъоварӣ шудааст, ки нисбат ба ҳамин давраи соли 2022   50 ҳазор тонна зиёд мебошад.

Ба гуфтаи мутахассисон, меъёри тавсияшудаи истеъмоли картошка дар Тоҷикистон барои як нафар дар як сол 92 кг аст.

Ба гуфти олимони соҳаи кишоварзӣ, картошка дар системаи киштгардони зироат ҳамчун зироати пешкиштшаванда хуб дониста мешавад, зеро баъди кишти он қабати болоии хок ковок гашта, алафҳои бегона хеле кам мешаванд. Картошка ҳамчун зироат асосан ба воситаи лӯндаҳо парвариш меёбад.

Дар Тоҷикистон картошка дар минтақаи водии Рашт, ноҳияҳои вилояти Хатлон, минтақаи вилояти Суғд, водии Ҳисор ва минтақаи Вилояти Мухтори Кӯҳистони Бадахшон парвариш мешавад. Навъи беҳтарини картошка ба минтақаи Рашт рост меояд.

Ёдовар мешавем, ки дар вилояти Суғд маҷмуи маҳсулоти кишоварзӣ аз 2,7 миллиард сомонии соли 2010 ба 18,5 миллиард сомонӣ дар соли 2023 баробар шудааст, ки афзоиш 15,8 миллиард сомониро ташкил медиҳад. Истеҳсоли картошка дар ин давра 313,9 ҳазор тонна, шолӣ 26,6 ҳазор тонна, ангур 2,2 ҳазор тонна ва асал 421 тонна зиёд шудааст.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»