Вобаста ба нақши Президенти Тоҷикистон дар бунёди давлатдории навини тоҷикон конференсия доир шуд

ДУШАНБЕ, 16.11.2024. /АМИТ «Ховар»/. Бо заҳмат ва талошҳои Пешвои миллат муҳтарам Эмомалӣ Раҳмон миллати сарбаланди тоҷик ба дастовард ва муваффақияти беназир ноил гардид. Чунин иброз шуд дар конференсияи илмӣ-назариявии ҷумҳуриявӣ дар мавзуи «Нақши Президенти Ҷумҳурии Тоҷикистон Эмомалӣ Раҳмон дар бунёди давлатдории навини тоҷикон», ки 14 ноябр дар Академияи Вазорати корҳои дохилии Ҷумҳурии Тоҷикистон баргузор гардид.

Тавре дар ин академия ба АМИТ «Ховар» хабар доданд, дар конфронс иброз шуд, ки таҷлили Рӯзи Президенти Ҷумҳурии Тоҷикистон таърихи худро дорад. Дар ҷумҳурӣ ин ҷашн аз воқеаҳои солҳои 90-уми асри гузашта ва Иҷлосияи тақдирсози миллати тоҷик, ки ҳанӯз моҳи ноябри соли 1992 дар Хуҷандшаҳри бостонӣ доир шуда буд, сарчашма мегирад.

Таъкид шуд, ки зери роҳбарии Пешвои миллат муҳтарам Эмомалӣ Раҳмон Тоҷикистон тавонист, ки мустақилона тамомияти арзии хешро ҳифз намуда, умедвории ояндаро дар зеҳни шаҳрвандони мамлакат ба вуҷуд оварад.

«Ҳар соҳибватане, ки нисбат ба имрӯзу фардои ватанаш бетараф нест, ҳар тоҷике, ки миллати хешро дӯст медорад ва ҳар падару модаре, ки ояндаи фарзандони худро дар Тоҷикистони озод, обод, осоишта ва рушдкарда дидан мехоҳад, бояд посдори ин амалҳои созанда, сабақомӯз ва ибратбахш бошад»,-иброз шуд дар ҳамоиш.

Ёдовар мешавем, ки конференсия ба Рӯзи Президенти Ҷумҳурии Тоҷикистон бахшида шуда, иштирокчиён дар мавзуъҳои «Эмомалӣ Раҳмон-асосгузор ва роҳбари сиёсати хориҷии Ҷумҳурии Тоҷикистон», «Президенти Ҷумҳурии Тоҷикистон муҳтарам Эмомалӣ Раҳмон-бунёдгузори Артиши миллӣ», «Нақши Пешвои миллат дар рушди қонунгузории миллӣ», «Нақши Пешвои миллат дар таҳкими субот ва ваҳдати миллӣ» ва «Фарҳанги сулҳ ва эътибори ҷаҳонии Пешвои миллат» маъруза намуданд.

АКС: Академияи Вазорати корҳои дохилии Ҷумҳурии Тоҷикистон