35-СОЛАГИИ ИСТИҚЛОЛИ ДАВЛАТӢ. Дар Ҷайҳун бинои баландошёнаи истиқоматӣ ва шуъбаи маориф ба истифода дода шуд

ДУШАНБЕ, 16.12.2024. /АМИТ «Ховар»/. Ба ифтихори 35-солагии Истиқлоли давлатии Ҷумҳурии Тоҷикистон дар ноҳияи Ҷайҳуни вилояти Хатлон бинои баландошёнаи истиқоматӣ ва шуъбаи маориф ба истифода дода шуд. Дар ин хусус ба АМИТ «Ховар» дар Хадамоти матбуоти Раиси вилояти Хатлон хабар доданд.

Зимни ба истифода додани ин иншоот иброз гардид, ки рушду пешрафт ва корҳои созандагӣ дар ноҳия бо таваҷҷуҳи рӯзафзун, ғамхорию дастгириҳои доимии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон амалӣ гардида, минбаъд низ чунин корҳои созандагӣ дар ноҳия вусъати тоза мегиранд.

Бо шарофати сулҳу амонӣ вазъи иҷтимоию иқтисодии ноҳия низ ба куллӣ тағйир ёфта, сол то сол симои он дигар мешавад.

Иттилоъ дода шуд, ки бинои баландошёнаи истиқоматӣ дар доираи бунёдкорию созандагӣ ва ободонӣ бахшида ба ҷашни бузурги миллӣ — 35-солагии Истиқлоли давлатии Ҷумҳурии Тоҷикистон ва рушди инфрасохтори ноҳия аз ҷониби соҳибкори маҳаллӣ бунёд гардидааст.

Дар сохтмони бинои истиқоматӣ 30 сокини маҳаллӣ бо ҷойи кори муваққатӣ ва маоши хуб таъмин гардиданд. Бо бунёд гардидани ин бинои баландошёна як гӯшаи шаҳраки Дӯстии ноҳияи Ҷайҳун ободу зеботар гашта, сокинон бо манзили зист ва шароити хуби зиндагӣ таъмин шуданд.

Ҳамзамон дар ноҳияи Ҷайҳун бинои маъмурии Шуъбаи маорифи ноҳия низ мавриди истифода қарор гирифт. Сохтмони бино соли 2022 оғоз ёфта, дар айни замон корҳои сохтмонӣ ба анҷом расидаанд.

Иттилоъ дода шуд, ки барои сохтмони бинои шуъбаи маориф 0,18 гектар замин ҷудо гардида, бино аз ҳисоби Бонки исломии рушд ба маблағи 353 946 доллари амрикоӣ бунёд гардид.

Иншоот аз 3 ошёна, 13 утоқи корӣ, 1 маҷлисгоҳ барои 80 нафар, 3 ҳуҷраи хоб барои меҳмонон, 1 китобхона, ҳаммом, анборхона барои нигоҳдории таҷҳизоту ҳуҷҷатҳо иборат буда, пудратчии сохтмон Ҷамъияти дорои масъулияти маҳдуди «Субҳи босафо» мебошад.

АКС: Хадамоти матбуоти Раиси вилояти Хатлон