Дар Донишгоҳи технологии Тоҷикистон оид ба нақши иқтисоди даврӣ дар таъмини самараноки захираҳои табиӣ ҳамоиш доир шуд

ДУШАНБЕ, 24.12.2024 /АМИТ «Ховар»/. Дар Донишгоҳи технологии Тоҷикистон дар доираи лоиҳаи CirculEс – «Таҳияи барномаи таълимӣ ва модулҳои инноватсионӣ дар иқтисоди даврӣ ва рушди устувор» дар мавзуи «Нақши иқтисоди даврӣ дар таъмини истифоди самараноки захираҳои табиӣ дар Ҷумҳурии Тоҷикистон» ҳамоиш баргузор шуд, хабар медиҳад АМИТ «Ховар» бо истинод ба ин донишгоҳ.

Дар ҳамоиш дар мавзуъҳои «Иқтисоди даврӣ дар шароити амалисозии консепсияи рушди устувор», «Истифодаи самараноки технологияи муосир дар раванди фаъолияти соҳибкории экологӣ ва нақши он дар ташаккули иқтисоди «сабз»», «Нақши рақамикунонии иқтисодиёт дар татбиқи модели иқтисоди даврӣ» ва «Нақши истеъмолкунандагон дар татбиқи иқтисоди даврӣ» аз ҷониби устодони донишгоҳ ва меҳмонон маърузаҳо пешниҳод ва паҳлуҳои гуногуни иқтисодиёти даврӣ баррасӣ гардид.

Таъкид шуд, ки иқтисоди даврӣ дар Тоҷикистон самти муҳими сиёсати иқтисодӣ ва муҳити зист мебошад. Истифодаи самаранок ва мақсадноки захираҳои табиӣ метавонад мамлакатро на танҳо аз таҳдидҳои экологӣ ва иқтисодӣ ҳифз, балки рушди устувори онро низ таъмин намуда, ба ҳалли масоили глобалӣ, ба монанди тағйироти иқлим ва кам кардани партовҳо мусоидат намояд.

Иқтисоди даврӣ модели рушди иқтисодӣ аст, ки ҳадафи он таъмин намудани истифодаи самараноки захираҳо, ба роҳ мондани истифодаи такрории онҳо, коркарди дубораи партовҳо, инчунин дар ин асос дароз кардани муҳлати хизмати мавод мебошад.

АКС: Донишгоҳи технологии Тоҷикистон