Густариши ҳамкории байнипарлумонии Тоҷикистон ва Чин баррасӣ гардид

ДУШАНБЕ, 20.12.2024 /АМИТ «Ховар»/. Имрӯз муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ бо муовини мудири шуъбаи байналмилалии Кумитаи марказии Ҳизби Коммунистии Ҷумҳурии Мардумии Чин Чен Чжоу ва ҳайати ҳамроҳони ӯ мулоқот намуд. Дар ҷараёни мулоқот маҷмуи васеи масъалаҳои ҳамкории байнипарлумонӣ мавриди баррасӣ қарор дода шуд. Дар ин хусус ба АМИТ «Ховар» дар Маҷлиси намояндагон хабар доданд.

Зимни мулоқот Мавсума Муинӣ таъкид намуд, ки муносибатҳои сиёсӣ, иқтисодӣ ва фарҳангии давлатҳои мо дар сатҳи баланд қарор дошта, ин имкони татбиқи мувофиқаҳои қаблан бадастомадаро фарохтар месозад.

Иброз гардид, ки «мо аз раванди мусбати ҳамкории байнипарлумонӣ ва густариши робитаҳо байни мақомоти қонунгузори ду давлат изҳори қаноатмандӣ мекунем. Дар заминаи таъсиси Гурӯҳи дӯстӣ ва ҳамкорӣ байи ду парлумон умедворем, ки ин гурӯҳ дар ин самт нақши муҳим мебозад».

Дар ҷараёни мулоқот густариши муносибатҳои ҳамкорӣ дар доираи ташкилоти бонуфуз, аз қабили Созмони ҳамкории Шанхай ва дигар созмонҳои  байналмилалӣ мавриди баррасӣ қарор гирифт.

АКС: Маҷлиси намояндагони Маҷлиси Олии Ҷумҳурии Тоҷикистон