Дар Сеул имконияти сайёҳии Тоҷикистон рӯнамоӣ гардид

ДУШАНБЕ, 07.12.2024 /АМИТ «Ховар»/. 6 декабр дар шаҳри Сеул Рӯзи дӯстии кишварҳои Осиёи Марказӣ-Ҷумҳурии Корея баргузор гардид, хабар медиҳад АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии Корея.

Дар чорабинии мазкур Намоиши аксҳои  мавзеъҳои ба рӯйхати ЮНЕСКО дохилшудаи Тоҷикистон ташкил гардида, имкониятҳои сайёҳии ҷумҳурӣ  рӯнамоӣ карда шуд.

Бояд гуфт, ки Тоҷикистон ва Корея дар чаҳорчӯби Форуми ҳамкории Ҷумҳурии Корея бо кишварҳои Осиёи Марказӣ  равобити  мутақобилан судмандро тақвият мебахшанд.

30 ноябри соли 2021 дар шаҳри Душанбе нишасти 14-уми вазирони корҳои хориҷии Форуми ҳамкории Осиёи Марказӣ ва Ҷумҳурии Корея баргузор гардид, ки дар он  вазирони корҳои хориҷии кишварҳои мазкур иштирок намуданд.

Иловатан бар ин, дар асоси пешниҳоди ҷониби тоҷикистонӣ тавассути Шурои тиҷоратии Котиботи Форум, аввалин Бизнес-форуми тиҷоратии абзори 5+1 доир гардид.

АКС: Сафорати Ҷумҳурии Тоҷикистон дар Ҷумҳурии Корея