Бо мақсади муаррифии ёдгориҳои таърихии Тоҷикистон силсилакитобҳо ба нашр мерасанд

ДУШАНБЕ, 27.01.2025. /АМИТ «Ховар»/. Бо мақсади муаррифии ёдгориҳои таърихии Тоҷикистон силсилакитобҳо чоп карда мешаванд. Дар ин хусус ба АМИТ «Ховар» аз Агентии ҳифзи мероси таърихию фарҳангии назди Ҳукумати Ҷумҳурии Тоҷикистон хабар доданд.

Агентии ҳифзи мероси таърихию фарҳангии назди Ҳукумати Ҷумҳурии Тоҷикистон бо мақсади тарғиби фаромилии таъриху тамаддун, фарҳанги воло ва мероси хаттии миллати тоҷик теъдоде аз силсилакитобҳоро таҳти унвони «Ҳулбук-пойтахти Хатлон», «Панҷакенти қадим», «Водии Ҳисор», «Мақбараи Хоҷа-Машҳад», «Тахти Сангин», «Аҷинатеппа», «Қалъаи Ямчун» ва дигар ёдгориҳо таҳия ва омодаи чоп намуд.

Ин китобҳо тибқи тартиби номбаршуда дастраси алоқамандони таъриху тамаддуни тоҷик, олимону донишпажуҳон, хонандагону донишҷӯён, роҳбаладон, гардишгарон ва дӯстдорони китоб хоҳанд шуд.

Бояд ёдовар шуд, ки ин китобҳо дастурамал ва роҳнамо барои муаррифии ҳунари меъморӣ ва осори таърихӣ-фарҳангӣ дар рушди гардишгарии таърихӣ ва сайёҳӣ мебошанд.

Тарбияи насли ояндасози миллат дар руҳияи созандагӣ, бунёдкорӣ, ҳисси хештаншиносӣ, ватандӯстӣ, эҳтиром ба таърих, фарҳанг ва мероси гаронмояи ниёгон аз самтҳои афзалиятноки сиёсати Ҳукумати Ҷумҳурии Тоҷикистон ба шумор меравад.

АКС: Агентии ҳифзи мероси таърихию фарҳангии назди Ҳукумати Ҷумҳурии Тоҷикистон