Дар Бонки миллии Тоҷикистон вазъи низоми бонкӣ ва суғурта дар соли 2024 натиҷагирӣ карда шуд

ДУШАНБЕ, 09.01.2025 /АМИТ «Ховар»/. Ҷамъбасти натиҷаҳои фаъолияти низоми молиявӣ дар соли 2024 ва вазифаҳо барои соли 2025 дар ҷаласаи васеъ, ки таҳти роҳбарии раиси Бонки миллии Тоҷикистон Фирдавс Толибзода бо иштироки роҳбарони ташкилоти қарзии молиявӣ, Ассотсиатсияи бонкҳои Тоҷикистон, Ассотсиатсияи ташкилоти маблағгузории хурди Тоҷикистон, Хазинаи суғуртаи пасандозу амонатҳои Тоҷикистон ва ташкилоти суғуртавӣ баргузор гардид, баррасӣ шуд. Дар ин хусус  ба АМИТ «Ховар» аз Бонки миллии Тоҷикистон иттилоъ доданд.

Дар ҷаласа иброз гардид, ки Бонки миллии Тоҷикистон соли 2024 фаъолияти худро мутобиқи қонунгузории соҳавӣ ва вазифагузориҳое, ки аз Паёми Президенти Ҷумҳурии Тоҷикистон ба Маҷлиси Олӣ «Дар бораи самтҳои асосии сиёсати дохилӣ ва хориҷии Ҷумҳурии Тоҷикистон» бармеоянд, инчунин дар асоси «Дурнамои сиёсати пулию қарзии Ҷумҳурии Тоҷикистон барои соли 2024 ва давраи миёнамуҳлат» амалӣ намуд.

Раиси Бонки миллӣ  бо овардани маълумоти оморӣ афзуд, ки Бонки миллии Тоҷикистон барои татбиқи сиёсати пулию қарзӣ ва таъмини устувории низоми бонкӣ дар ҳамкорӣ бо дигар ниҳодҳои дахлдори мамлакат тадбирҳои зарурӣ андешида, раванди ислоҳоти соҳаи бонкдориро бо мақсади баланд бардоштани рушди иқтисодию иҷтимоии мамлакат идома дод.

Роҳбарони воҳидҳои сохтории Бонки миллии Тоҷикистон оид ба вазъи низоми бонкӣ дар соли 2024, таъмини суботи молиявӣ, татбиқи сиёсати асъорӣ, фаъолияти ташкилоти қарзии молиявӣ дар самти мониторинги молиявӣ, татбиқи сиёсати самараноки низоми пардохт, вазъи низомҳои иттилоотӣ ва баҳогузории хизматрасонии низоми бонкӣ тариқи рӯнамо ҳисобот доданд.

Намояндагони ташкилоти қарзии молиявӣ вобаста ба фаъолият, мушкилиҳои ҷойдошта, инчунин тақвияти заминаи сармоявии ташкилоти қарзӣ, беҳтар намудани сифати хизматрасонии бонкӣ, пурзӯр намудани низоми идоракунии хавфҳо, кам кардани ҳиссаи қарзҳои ғайрифаъол, баланд бардоштани савияи тахассусии кормандон, зиёд намудани ҳиссаи дороиҳои даромаднок, таъмини амнияти иттилоотӣ, иҷрои саривақтии талаботи дастурамалҳои бонк ва зиёд намудани ҳаҷми қарздиҳӣ ба соҳаҳои гуногуни иқтисодиёт сухан гуфтанд.

Таъкид гардид, ки аз рӯйи нишондиҳандаҳои асосӣ вазъи низоми бонкӣ ва суғурта дар соли 2024 беҳтар гардида, васеъ шудани доираи хизматрасониҳои онҳо ба мушоҳида мерасад. Аммо новобаста ба ин, бобати фаъолияти устувори низоми бонкӣ ва мусоидат ба рушди иқтисодиёти миллӣ ташкилоти қарзии молиявиро зарур аст, ки иҷрои саривақтии «Стратегияи миллии фарогирии молиявии Ҷумҳурии Тоҷикистон барои солҳои 2022-2026», «Стратегияи рушди фаъолияти ташкилоти қарзӣ барои солҳои 2022-2026», пурра ҷорӣ намудани низоми рақамии хизматрасонии бонкӣ ва суғуртавӣ дар ҳама минтақаҳои мамлакат ва истифодаи васеи технологияҳои молиявӣ, беҳтар намудани сатҳу сифати хизматрасониҳои бонкӣ ва суғуртавиро тақвият бахшанд. Инчунин дар самти таъмини баробарии гендерӣ, пурзӯр намудани низоми назорати дохилӣ ва идоракунии хавфҳо, кам кардани ҳиссаи қарзҳои ғайрифаъол дар сандуқи қарзӣ, андешидани тадбирҳо барои тақвияти  заминаи сармоявӣ ва ҷалби бештари сармоягузориҳо, хусусан маблағгузориҳои дарозмуҳлат, баланд бардоштани савияи дониш ва касбияти кормандон, зиёд намудани ҳиссаи дороиҳои даромаднок, пурзӯр намудани идоракунии хавфҳои киберӣ ва таъмини амнияти иттилоотӣ, шаффофияти фаъолияти ташкилоти қарзӣ ва суғуртавӣ, талаботи санадҳои меъёрии ҳуқуқӣ, қонеъ кардани арзу шикоятҳо нисбат ба хизматрасониҳои бонкӣ ва суғуртавӣ тадбирҳои зарурӣ андешанд.

Ҳамзамон таъкид гардид, ки барои идома додани татбиқи Қонуни Ҷумҳурии Тоҷикистон «Дар бораи авф бинобар қонунигардонии дороиҳо ва маблағҳои шаҳрвандони Ҷумҳурии Тоҷикистон», рафъи камбудиҳо бобати муайянкунии қурби асъор ва ба роҳ мондани назорати қатъӣ дар амалиёти асъорӣ, инчунин иҷрои Фармони Президенти Ҷумҳурии Тоҷикистон «Дар бораи тадбирҳои вусъат додани ҳисоббаробаркунии ғайринақдӣ», амалӣ намудани супоришҳои Паёми Президенти Тоҷикистон ба Маҷлиси Олӣ дар самти рақамикунонӣ ва гузариши пурра ба пардохтҳои ғайринақдӣ дар соҳаҳои буҷетӣ ва хизматрасонии давлатӣ дар соли 2025 тадбирҳои судманд андешида шаванд.

АКС: Бонки миллии Тоҷикистон